మహబూబ్నగర్, జూలై 6 : మహబూబ్నగర్ జిల్లా కేంద్రంలో దళితుడికి తీరని అవమానం జరిగింది. ఈ ఘటన ఆలస్యంగా వెలుగులోకి వచ్చింది. బాధితుడి కథనం ప్రకారం.. స్థానిక మోతీనగర్లో దళితుడు ఎత్తపోల్ల వెంకట్రాములు కూలి పనులు చేసుకుంటూ జీవనం సాగిస్తున్నాడు.
శుక్రవారం సాయంత్రం అదే ప్రాంతంలోని ఆంజనేయ స్వామి ఆలయానికి వెళ్లగా.. అదే కాలనీకి చెందిన బోయ శివ, శశికుమార్, మూర్తి అడ్డుకున్నారు. ‘కులం తక్కువ వాడివి.. గుడిలోకి ఎందుకు వస్తావ్’ అంటూ దబాయించడంతోపాటు నెట్టేశారు. పరుష పదజాలంతో దుర్భాషలాడారు. వెంటనే డయల్ 100కు ఫోన్ చేసినా పోలీసులు స్పందించలేదని బాధితుడు వాపోయాడు.
అదే రాత్రి 9:30 గంటలకు తాను ఇంట్లో లేని సమయంలో వచ్చి కుటుంబ సభ్యులను బెదిరించారని ఆయన ఆవేదన వ్యక్తంచేశాడు. ఈ ఘటనపై శనివారం టూటౌన్ పోలీస్స్టేషన్లో ఫిర్యాదు చేసినట్టు పేర్కొన్నాడు.