హైదరాబాద్, ఏప్రిల్ 14 (నమస్తే తెలంగాణ): దేశ ప్రజల జీవన విధానం సంతోషానికి అందనంత దూరంగా సాగుతున్నదని హ్యాపీనెస్ గురుకుల వ్యవస్థాపకురాలు శృతి మహేశ్వరి తెలిపారు. వరల్డ్ హ్యాపీనెస్ రిపోర్ట్-2022లో భారత్ది 136వ ర్యాంకని గుర్తుచేశారు. హైదరాబాద్లో వాక్సన్ యూనివర్సిటీ ఆధ్వర్యంలో నిర్వహించిన గ్లోబల్ ఇంపాక్ట్ సమ్మిట్లో ఆమె మాట్లాడుతూ.. హ్యాపీనెస్ అనేది దేశంలోని పాలన, పరిస్థితులపై ఆధారపడి ఉంటుందని తెలిపారు. ప్రభుత్వ విధానాలు ప్రజలను ఆనందంగా ఉంచడానికి దోహదపడాలని సూచించారు. సగటు మనిషి సంపాదనలో ఎక్కువ శాతం దవాఖానలకు వెళ్తున్నదని ఎర్లీశాలరీ చీఫ్ డిస్ట్రిబ్యూషన్ ఆఫీసర్ డాక్టర్ అమోల్ మహేశ్వరి ఆవేదన వ్యక్తంచేశారు. దేశంలో 7 శాతం మందికే ఆరోగ్య బీమా ఉన్నదని పేర్కొన్నారు. ప్రతి ఒక్కరూ ఓటమిని వైఫల్యంగా చూడకుండా, విజయానికి గుణపాఠంగా స్వీకరించాలని మిస్టర్ వరల్డ్-2016 రోహిత్ కండేవాలా సూచించారు. సదస్సులో వాక్సన్ యూనివర్సిటీ రిసెర్చ్ మేనేజ్మెంట్ హెడ్ డాక్టర్ పీ స్వామిసాయిరాం, టీసీఎస్ ఆర్టిఫిషియల్ ఇంటెలిజెన్స్ లీడ్ డాక్టర్ దామరాజు పవన్కుమార్, మల్లారెడ్డి హెల్త్సిటీ ఎండీ డాక్టర్ సీహెచ్ ప్రీతిరెడ్డితో పాటు 13 దేశాలకు చెందిన విద్యావేత్తలు, పర్యావరణవేత్తలు, మేధావులు పాల్గొన్నారు.