హైదరాబాద్, ఏప్రిల్ 13 (నమస్తే తెలంగాణ): ముఖ్యమంత్రి కే చంద్రశేఖర్రావు నాయకత్వంలో తెలంగాణ రాష్ట్రం అన్ని రంగాల్లో విప్లవాత్మక ప్రగతి సాధిస్తున్నదని రాష్ట్ర పరిశ్రమల శాఖ మంత్రి కే తారకరామారావు ఉద్ఘాటించారు. ఎనిమిదేండ్లలోనే ‘నేడు తెలంగాణ చేసింది.. రేపు దేశం అనుసరిస్తుంది’ అనే స్థాయికి రాష్ట్రం ఎదిగిందని చెప్పారు. దళితులు, గిరిజనులు ప్రభుత్వం కల్పిస్తున్న అవకాశాలను అందిపుచ్చుకొంటూ ఉన్నత శిఖరాలకు ఎదగాలని పిలుపునిచ్చారు. రాష్ట్ర పరిశ్రమల శాఖ ఆధ్వర్యంలో గురువారం హైదరాబాద్ బేగంపేటలోని మేరీగోల్డ్ హోటల్లో అంబేద్కర్ జయంతి వేడుకలు నిర్వహించారు.
ఈ కార్యక్రమంలో పాల్గొన్న మంత్రి కేటీఆర్ మాట్లాడుతూ, దళితుల అభ్యున్నతిలో తెలంగాణ రాష్ట్రం దేశానికే ఆదర్శంగా నిలవాలనే సంకల్పంతో సీఎం కేసీఆర్ దళితబంధు పథకాన్ని ప్రవేశపెట్టారని చెప్పారు. దండు మల్కాపూర్లో డిక్కీ (దళిత్ ఇండియన్ చాంబర్ ఆఫ్ కామర్స్ అండ్ ఇండస్ట్రీ)కి రెండెకరాల స్థలాన్ని కేటాయిస్తున్నట్టు ప్రకటించారు. అంబేద్కర్ జయంతి రోజైన శుక్రవారం సీఎం చేతులమీదుగా భూమి పత్రాలను అందజేస్తామని కేటీఆర్ ప్రకటించారు. దీనిపై టీఎస్ఐఐసీ ఎండీకి వెంటనే ఆదేశాలిచ్చినట్టు చెప్పారు. దళిత పారిశ్రామికవేత్తలతో త్వరలో సమావేశమై వారి సమస్యల పరిష్కారానికి కృషిచేస్తామని హామీ ఇచ్చారు.
తెలంగాణ డజ్ టుడే, ఇండియా డజ్ టుమారో
వాట్ బెంగాల్ డజ్ టుడే, ఇండియా డజ్ టుమారో అనే నానుడి గతంలో ఉండేదని, ఇప్పుడు తెలంగాణ డజ్ టుడే, ఇండియా డజ్ టుమారోగా మారిపోయిందని మంత్రి కేటీఆర్ అన్నారు. తెలంగాణ అమలుచేసిన రైతుబంధు, మిషన్ భగీరథ, మిషన్ కాకతీయ తదితర పథకాలను పేరుమార్చి కేంద్ర ప్రభుత్వం అమలుచేయటమే ఇందుకు నిదర్శనమని చెప్పారు. దళిత పారిశ్రామికవేత్తలు దేశానికి గర్వకారణంగా మారతారనే ఉద్దేశంతోనే సబ్సిడీ ఇచ్చే పథకానికి టీ-ప్రైడ్ అని పేరు పెట్టామని పేర్కొన్నారు. ఏటా రూ.100 కోట్ల రాయితీలతో మొదలుపెట్టి నేడు రూ.562 కోట్లకు చేరుకున్నదని తెలిపారు. దళిత పారిశ్రామికవేత్తలు ఎటువంటి సంశయం లేకుండా ముందుకు సాగాలని సూచించారు.
దమ్ము, ఖలేజా ఉన్న నేత కేసీఆర్
దేశంలో దళితబంధు పథకం వంటి ఆలోచన రావాలంటే దమ్ముండాలని.. కేసీఆర్ దమ్మున్న, ఖలేజా ఉన్న నేత కాబట్టే ఈ పథకానికి రూపకల్పన చేశారని మంత్రి కేటీఆర్ తెలిపారు. ‘కేసీఆర్ రిబ్బన్లు కత్తిరించడానికి, కొబ్బరికాయలు కొట్టడానికి వచ్చిన నాయకుడు కాదు. సచివాలయంలో కూర్చొని సంతకాలు పెట్టే నాయకుడు కాదు. ఆయన ఆలోచనలు విప్లవాత్మకంగా ఉంటాయి. హరితహారం కార్యక్రమం అందుకు చిన్న ఉదాహరణ’ అని పేర్కొన్నారు. తెలంగాణలో గతంలో 64 లక్షల టన్నుల ధాన్యం పండితే నేడు 2.58 కోట్ల టన్నుల దిగుబడి వస్తున్నదని, భూములన్నీ సస్యశ్యామలమై ధరలు పెరిగాయని చెప్పారు. వంద శాతం నివాసాలకు మంచినీళ్లిచ్చిన ఏకైక రాష్ట్రం తెలంగాణ అని, గుజరాత్లో సైతం ఇది సాధ్యంకాలేదని పేర్కొన్నారు. దళితబంధులో భాగంగా నాన్ మోటరైజ్డ్ యూనిట్లు పెట్టేలా ప్రోత్సహించాలని అధికారులను కోరినట్ట్లు చెప్పారు. సిరిసిల్లలోని పదిర గ్రామంలో ఇద్దరుముగ్గురు లబ్ధిదారులు కలిసి రైస్మిల్లులు, కోళ్ల ఫారాలు, పెట్రోల్ బంకుల వంటివి ఏర్పాటు చేస్తున్నారని ఉదహరించారు.
దళిత చైతన్యజ్యోతి నాడే వెలిగించిన కేసీఆర్
ఎన్నికల్లో గెలిచినా, ఓడినా పెద్దగా పట్టించుకోమని, ప్రజలకు మంచి చేస్తూనే ఉంటామ కేటీఆర్ అన్నారు. నిర్ణయం తీసుకొనేందుకు ధైర్యం ఉండాలని, ఆ ధైర్యం ఉన్నది కాబట్టే దళితబంధు వంటి పథకాలను ప్రవేశపెట్టినట్టు చెప్పారు. సిద్దిపేటలో 40 ఏండ్ల క్రితమే హరితహారానికి బీజం పడిందని, ఒక్కరోజే 10 వేల మొక్కలు నాటారని తెలిపారు. దళిత చైతన్య జ్యోతి పేరుతో ఆనాడే సిద్దిపేటలో దళితబంధును కేసీఆర్ ప్రవేశపెట్టారని గుర్తు చేశారు. రిజర్వేషన్లు అమెరికాలో కూడా ఉన్నాయని తెలిపారు. మనం ఏదైనా చేయాలంటే అడ్డుకొనేవాళ్లు ఎంతోమంది ఉంటారని, అయినా వెరవకుండా ముందుకు సాగితే ఏదైనా సాధించవచ్చని పేర్కొన్నారు.
వివక్షను వీడితేనే చైనా తరహా అభివృద్ధి
మూడునాలుగేండ్ల క్రితం ప్రధాని మోదీ అఖిలపక్ష సమావేశం ఏర్పాటుచేసి ఆజాదీ కా అమృత్ మహోత్సవ్పై అభిప్రాయాలు సేకరించారని, అప్పుడు బీఆర్ఎస్ తరపున వెళ్లిన తాను థ్రీ ఐ మంత్ర పాటిస్తే ఇండియా అభివృద్ధి చెందిన దేశంగా మారుతుందని చెప్పినట్టు మంత్రి కేటీఆర్ గుర్తుచేశారు. ఆవిష్కరణలు, మౌలిక సదుపాయాలు, సమ్మిళిత అభివృద్ధితోనే దేశం ముందుకు సాగుతుందని, అదే థ్రీఐ మంత్ర అని వివరించారు. వివక్ష లేకుండా అందరినీ కలుపుకొని వెళ్లినప్పుడే దేశం అభివృద్ధి సాధ్యమని పేర్కొన్నారు. 1987లో చైనా, భారత్ ఆర్థిక వ్యవస్థలు సమానంగా ఉండగా, నేడు భారత్ ఆర్థిక వ్యవస్థ 3.4 ట్రిలియన్ డాలర్లు ఉంటే చైనా జీడీపీ 18 ట్రిలియన్ డాలర్లకు పెరిగిందని తెలిపారు. చైనా వివక్ష లేకుండా ముందుకు సాగబట్టే ఇది సాధ్యమైందని అన్నారు. తెలంగాణ వంటి ప్రగతిశీల రాష్ర్టాన్ని ప్రోత్సహించాలని కేంద్రానికి మరోసారి విజ్ఞప్తి చేశారు. 35 శాతం వ్యాక్సిన్ డోసులు మన రాష్ట్రం నుంచే ఉత్పత్తి అవుతున్నా, హైదరాబాద్ ఫార్మాసిటీకి కేంద్రం సహాయం చేయడంలేదని విమర్శించారు. డిఫెన్స్ ఇండస్ట్రియల్ కారిడార్ను రక్షణరంగ సంస్థలున్న మనకు ఇవ్వకుండా, ఏమీలేని బుందేల్ఖండ్కు ఇచ్చారని తెలిపారు. అక్కడ ఉన్న 80 ఎంపీ సీట్ల కోసమే కేంద్రం ఇలాంటి నిర్ణయం తీసుకొన్నదని దుయ్యబట్టారు.
పార్లమెంటుకు అంబేద్కర్ పేరు పెట్టాలి
అంబేద్కర్ విగ్రహావిష్కరణ, సచివాలయ ప్రారంభోత్సవానికి అందరూ రావాలని మంత్రి కేటీఆర్ ఆహ్వానించారు. అంబేద్కర్ మొత్తం దేశానికి నాయకుడని, అందుకే కొత్తగా నిర్మించిన సచివాలయానికి ఆయన పేరు పెట్టినట్టు చెప్పారు. పార్లమెంటుకు కూడా అంబేద్కర్ పేరు పెట్టాలని డిమాండ్ చేశారు.
దేశానికి దిక్సూచిగా తెలంగాణ: కొప్పుల ఈశ్వర్
టీ-ప్రైడ్ ద్వారా వేలమంది దళితులు పారిశ్రామికవేత్తలుగా ఎదిగేందుకు రాష్ట్ర ప్రభుత్వం కృషిచేస్తున్నదని మంత్రి కొప్పుల ఈశ్వర్ అన్నారు. కేటీఆర్ వంటి మంచి మంత్రి ఉండటంతో పరిశ్రమల శాఖ పరుగులు పెడుతున్నదని పేర్కొన్నారు. తెలంగాణలో విజన్ ఉన్న నేత ఉండటంవల్లే నూతన ఆవిష్కరణలు జరుగుతున్నాయని అన్నారు. తెలంగాణ నేడు ఏ రంగంలో చూసినా దేశానికి దిక్సూచిగా మారిందని తెలిపారు. ఐటీలో నంబర్ 1 స్థానంలో ఉండటం కేటీఆర్ కృషివల్లనే సాధ్యమైందని కొనియాడారు.
నాణ్యమైన విద్యతోపాటు పరిశ్రమలకు రాయితీలు: సత్యవతి రాథోడ్
అందరితో సమానంగా దళిత, గిరిజనులను కూడా వృద్ధిలోకి తీసుకురావాలనే సంకల్పంతో సీఎం కేసీఆర్ కృషిచేస్తున్నారని మంత్రి సత్యవతి రాథోడ్ చెప్పారు. నాణ్యమైన విద్య కోసం గురుకులాలను ప్రారంభించటంతోపాటు పారిశ్రామికవేత్తలుగా తీర్చిదిద్దేందుకు టీ-ప్రైడ్ను ప్రవేశపెట్టారని తెలిపారు. ఐఎస్బీలో ఏటా 100 మందిని తీసుకోవాలనుకుంటే పెద్ద ఎత్తున దరఖాస్తులు వచ్చాయని, దీంతో ఏటా 500 మందికి ఐఎస్బీలో ప్రవేశాలకు తగిన శిక్షణను అందిస్తున్నామని పేర్కొన్నారు. దేశంలో ఎక్కడా లేని విధంగా తెలంగాణలో ఇండస్ట్రియల్ హెల్త్ క్లినిక్ను ఏర్పాటు చేశామని తెలిపారు. కేసీఆర్ ప్రభుత్వం అంబేద్కర్ ఆశయాలను సాకారం చేస్తున్నదని అన్నారు.
వైఫల్యాలను కూడా సెలబ్రేట్ చేసుకొంటేనే కిక్కు
వైఫల్యాలను కూడా సెలబ్రేట్ చేసుకొంటేనే లైఫ్లో కిక్కు ఉంటుందని కేటీఆర్ అన్నారు. రోజూ ట్రాఫిక్, కాలుష్యంతో ఇబ్బంది పడుతూ జీవితాన్ని తిట్టుకొనేవారు, కొవిడ్ సమయంలో రెండేండ్ల్లు ఇండ్లలో కూర్చోగానే ఆ స్వేచ్ఛా వాయువుల గొప్పతనాన్ని గుర్తించారని చెప్పారు. ఓటమి ఉంటేనే గెలుపు మజా తెలుస్తుందని పేర్కొన్నారు. కేసీఆర్ కూడా 1983లో మొదటిసారి ఎమ్మెల్యేగా 750 ఓట్ల తేడాతో ఓడిపోయారని, ఆ తరువాత వరుస గెలుపులతో మళ్లీ వెనక్కి తిరిగి చూడలేదని గుర్తుచేశారు.
రాయితీ చెక్కుల పంపిణీ
8000 మంది టీ-ప్రైడ్ లబ్ధిదారులకు రూ.562 కోట్ల రాయితీలకు సంబంధించిన చెక్కులను మంత్రి కేటీఆర్ పంపిణీ చేశారు. అనంతరం ఉత్తమ దళిత, గిరిజన పారిశ్రామికవేత్తలను సత్కరించారు. ఈ కార్యక్రమంలో మంత్రులు కొప్పుల ఈశ్వర్, సత్యవతి రాథోడ్, ఎంపీ వెంకటేశ్ నేత, టీఎస్ఐఐసీ చైర్మన్ బాలమల్లు, ఎస్సీ కార్పొరేషన్ చైర్మన్ బండా శ్రీనివాస్, ఎమ్మెల్యేలు సైదిరెడ్డి, రేఖానాయక్, ఎస్టీ ఫైనాన్స్ కార్పొరేషన్ చైర్మన్ ఇస్లావత్ రామ్చందర్, పరిశ్రమల శాఖ ముఖ్య కార్యదర్శి జయేశ్ రంజన్, డిక్కీ జాతీయ అధ్యక్షుడు నర్రా రవికుమార్, సీఐఐ చైర్మన్ శేఖర్రెడ్డి, హ్యాండ్లూమ్స్ కార్యదర్శి బుద్ధప్రకాశ్, టీఎస్ఐఐసీ ఎండీ వెంకట నర్సింహారెడ్డి తదితరులు పాల్గొన్నారు.
అంబేదర్ పాటల సీడీని ఆవిషరించిన మంత్రి కేటీఆర్
హైదరాబాద్, ఏప్రిల్ 13 (నమస్తే తెలంగాణ): అంబేద్కర్ స్ఫూర్తిని అవలోకనం చేసుకొని పాటల సీడీని రూపొందించడం పట్ల బీఆర్ఎస్ పార్టీ వర్కింగ్ ప్రెసిడెంట్, రాష్ట్ర పురపాలక, ఐటీశాఖల మంత్రి కేటీఆర్ అభినందనలు తెలిపారు. అంబేద్కర్ జయంతి సందర్భంగా బొల్లికొండ వీరేందర్ నిర్మాణ సారథ్యంలో రచయిత ఎంవీ, సింగర్ అండ్ మ్యూజిక్ డైరెక్టర్ పూర్ణ చందర్ రూపొందించిన ‘అంబేద్కర్ పాటల సీడీ’ని గురువారం మంత్రులు కొప్పుల ఈశ్వర్, సత్యవతి రాథోడ్తో కలిసి కేటీఆర్ ఆవిష్కరించారు. దేశంలోనే అతిపెద్ద 125 అడుగుల అంబేదర్ విగ్రహాన్ని ఏర్పాటు చేసి రాజ్యాంగ నిర్మాత ఆశయ సాధనకు నిజమైన నమూనాగా తెలంగాణ నిలిచిందని కేటీఆర్ పేర్కొన్నారు. కార్యక్రమంలో టీఎస్ఐఐసీ కార్పొరేషన్ చైర్మన్ గ్యాదరి బాలమల్లు, రాష్ట్ర వికలాంగుల కార్పొరేషన్ చైర్మన్ కే వాసుదేవ రెడ్డి తదితరులు పాల్గొన్నారు.