Khammam | తిరుమలాయపాలెం, మే 31 : ‘మేము ఓట్లు వేసి మిమ్మల్ని గెలిపించాం. మాకు ఇండ్లు, రేషన్ కార్డులు, పింఛన్లు లేవు. వాటిని మంజూరు చేయాలని కోరితే కూడా పట్టించుకంట లేరు.. ఇదేంది సారూ’ అని పలువురు మహిళలు మంత్రి పొంగులేటి శ్రీనివాస్రెడ్డి ఎదుట ఆవేదన వ్యక్తం చేశారు. శుక్రవారం ఖమ్మం జిల్లా తిరుమలాయపాలెం మండలం కొక్కెరేణిలో గ్రామంలో మంత్రి పొంగులేటి పర్యటన సందర్భంగా జరిగిన సభలో బోండ వెంకటలక్ష్మి అనే మహిళ మాట్లాడుతూ.. తన భర్త పేరిట రెండున్నర ఎకరాల భూమి ఉన్నా.. రైతుబంధు, రైతుబీమా రాలేదని ఆవేదన వ్యక్తంచేసింది. గుర్తుతెలియని వ్యక్తులు తన భర్తను హత్య చేసినా ఎవరూ పట్టించుకోలేదని కంటతడి పెట్టింది.
స్పందించిన మంత్రి పొంగులేటి.. సమస్యలను పరిష్కరిస్తానని హామీ ఇచ్చారు. కాగా పలువురు మహిళలు సైతం మాట్లాడుతూ తమకు సంక్షేమ పథకాలు అందడం లేదని ఆవేదన వెళ్లగక్కారు. కాగా అంతకుముందు మంత్రి పొంగులేటి కారు దిగగానే జడ్పీటీసీ సభ్యుడు బెల్లం శ్రీనివాసరావు, కాంగ్రెస్ నాయకుడు చావా శివరామకృష్ణ వర్గీయులు ఆధిపత్యం కోసం పోటాపోటీగా నినాదాలు చేశారు. సభలో తమ తమ వర్గాల నాయకులు మాట్లాడుతున్న క్రమంలో బెల్లం శీనన్న జిందాబాద్, శివన్న జిందాబాద్ అంటూ నినాదాలతో హోరెత్తించారు. కాగా ఎవరికి వారు సభలు ఏర్పాటు చేయగా మంత్రి రెండు చోట్లకు వెళ్లి ప్రజల నుంచి వినతులు స్వీకరించారు.