హైదరాబాద్, జూలై 1 (నమస్తే తెలంగాణ): ప్రభుత్వ జూనియర్ కళాశాలల పనితీరును పర్యవేక్షించేందుకు అధికారులు ఐఈ (ఇంటర్మీడియట్ ఎడ్యుకేషన్) యాప్ను అందుబాటులోకి తీసుకొచ్చారు. ఐటీశాఖ రూపొందించిన ఈ యాప్ ద్వారా రోజువారీగా విద్యార్థుల హాజరు, అకడమిక్ క్యాలెండర్ అమలు, తనిఖీలు, అధ్యాపకుల పనితీరు, పాఠ్యపుస్తకాల ట్రాకింగ్ తదితర అంశాలను పర్యవేక్షించనున్నారు. ఇటీవలే రెండు మల్టీజోన్లలోని జిల్లా ఇంటర్మీడియట్ విద్యాధికారులు, కళాశాల ప్రిన్సిపాళ్లకు రెండు రోజుల పాటు యాప్ పనితీరుపై అవగాహన కల్పించారు. యాప్ను డౌన్లోడ్ చేసుకుని, రోజువారీగా వివరాలు నమోదుచేయాలని సూచించారు. రాష్ట్రంలో 422 ప్రభుత్వ జూనియర్ కళాశాలల్లో 78వేలకు పైగా సెకండియర్ విద్యార్థులుండగా, ప్రస్తుతానికి 40వేలకు పైగా విద్యార్థులు ఫస్టియర్లో చేరారు. 393 మంది ప్రిన్సిపాళ్లు, 3,671 మంది లెక్చరర్లు పనిచేస్తున్నారు. కళాశాలలపై పర్యవేక్షణ పెంచ డం ద్వారా విద్యాప్రమాణాలు పెంచే దిశలో ఈ యాప్ను అందుబాటులోకి తీసుకొచ్చినట్టు అధికారులు తెలిపారు.
ఎస్సీ కార్పొరేషన్ ఆధ్వర్యంలో ఉపాధి శిక్షణ
హైదరాబాద్, జూలై1 (నమస్తే తెలంగాణ): తెలంగాణ ఎస్సీ కార్పొరేషన్ ఆధ్వర్యంలో నిరుద్యోగ ఎస్సీ యువతకు ఉచిత ఉద్యోగ, ఉపాధి శిక్షణ ఇవ్వనున్నారు. తెలంగాణ స్కిల్ డెవలప్మెంట్ సెంటర్ ఫర్ నర్సెస్ ప్రాజెక్ట్ కో-ఆర్డినేటర్ సైదులు సోమవారం ఒక ప్రకటనలో వెల్లడించారు. 3నెలల వ్యవధితో జనరల్ డ్యూటీ అసిస్టెంట్, ఎమర్జెన్సీ మెడికల్ టెక్నీషియన్, మెడికల్ ల్యాబ్ టెక్నీషియన్, డొమెస్టిక్ డేటా ఎంట్రీ ఆపరేటర్ కోర్సుల్లో, డయాలసిస్ టెక్నీషియన్ 4 నెలల పాటు ఉచిత శిక్షణ ఇవ్వనున్నట్టు వివరించారు. హైదరాబాద్, నల్గొండ, మిర్యాలగూడ, ఖమ్మం, కరీంనగర్, సంగారెడ్డి, మెదక్, మేడ్చల్ (మల్కాజ్గిరి)లో శిక్షణ కేంద్రాలు ఉన్నాయని వెల్లడించారు. ఆసక్తి ఉన్న యువత 5లోగా దరఖాస్తు చేసుకోవాలని తెలిపారు. వివరాలకు 98485 81100, 90599 02355 నంబర్లలో సంప్రదించాలని సూచించారు.