హైదరాబాద్, మే 21 (నమస్తే తెలంగాణ): మత్స్యకారులైన బెస్త, ముదిరాజ్ తెగల మధ్య వివాదాల పరిషారానికి 3 నెలల్లోగా నిపుణుల కమిటీని ఏర్పాటు చేయాలని, ఆ కమిటీ ఇచ్చే నివేదికను పరిశీలించి 3 నెలల్లోగా నిర్ణయం తీసుకోవాలని హైకోర్టు రాష్ట్ర ప్రభుత్వాన్ని ఆదేశించింది. బెస్త, బోయి, గంగపుత్ర, గూండ్ల తెగలవారిని మత్స్యకారులుగా పరిగణనలోకి తీసుకోకపోవడంపై నిపుణుల కమిటీని ఏర్పాటు చేసేలా ప్రభుత్వానికి ఉత్తర్వులు జారీ చేయాలని లేనిపక్షంలో ఈ అంశాన్ని బీసీ కమిషన్కు సిఫార్సు చేయాలని కోరుతూ దాఖలైన పిటిషన్లపై జస్టిస్ భీమపాక నగేశ్ ఇటీవల విచారణ జరిపారు. వాటితోపాటు బెస్త, బోయి, గూండ్ల, గంగపుత్రలతో కూడిన మత్స్యకారుల సహకార సంఘాల్లో తమకు సభ్యత్వం ఇవ్వకపోవడాన్ని సవాలు చేస్తూ ముదిరాజ్, ముతరాసి, తెనుగోళ్లు తదితర తెగలు దాఖలు చేసిన 26 పిటిషన్లపై విచారణ జరిపి పై ఆదేశాలు జారీ చేశారు. వివరాల్లోకి వెళ్తే.. సహకార సంఘాల చట్టం కింద మత్స్యకారులు సంఘాలుగా ఏర్పడటానికి ప్రభుత్వం అవకాశం కల్పించింది.
దీంతో బెస్త, బోయి, గంగపుత్ర, గూండ్ల తెగలవారు సొసైటీలుగా ఏర్పాటై చెరువుల్లో చేపలు పట్టేందుకు లీజు హకులు పొందారు. తామే నిజమైన మత్స్యకారులమని.. ముదిరాజ్, ముతరాసి, తెనుగోళ్లు ‘బీసీ-డీ’ క్యాటగిరీకి చెందినవారు, వారు తోటపనివారుగా గుర్తింపు పొందారని బెస్త తెగలవారు చెప్తున్నారు. 1964లో జారీ అయిన జీవో 98 ప్రకారం గంగపుత్ర, ముతరాసిలతోపాటు 29 తెగలు చేపలు పట్టుకోవచ్చని, అందువల్ల తాము కూడా సొసైటీలో సభ్యత్వానికి అర్హులమని ముదిరాజ్, ముతరాసి తెగలవారు వాదిస్తున్నారు. ఈ రెండు వర్గాల మధ్య వివాదం ముదరడంతో ఒక్కో పక్షం నుంచి 10 మంది చొప్పున మొత్తం 20 మందితో గతంలో జాయింట్ యాక్షన్ కమిటీని ఏర్పాటు చేశారు. 2021 ఆగస్టు, సెప్టెంబర్లో ఈ కమిటీ మత్స్యశాక మంత్రితో సమావేశమైది. బెస్త, బోయి, గూండ్ల తెగలతో ఉన్న ప్రస్తుత సొసైటీల్లో సభ్యత్వంపై ఎలాంటి మార్పు ఉండరాదని ఈ భేటీలో నిర్ణయించారు. ఈ తెగలు లేనిచోట ఇతర తెగలవారు సొసైటీ ఏర్పాటు కోసం వస్తే పరిశీలించాలని తీర్మానించారు. ఈ తీర్మానాల ప్రకారం మత్స్యశాఖ కమిషనర్ 2021లో మెమో జారీ చేశారు. ఈ మెమో ప్రకారం జిల్లా అధికారులు 800 సొసైటీలను రిజిస్టర్ చేశారు. ఈ నేపథ్యంలో ముదిరాజ్ల తరఫున డీఎల్ పాండు, బెస్త తెగలవారి తరఫున విద్యావతి హైకోర్టులో వాదనలు వినిపిస్తూ.. నిపుణుల కమిటీ ఏర్పాటుకు అభ్యంతరం లేదని చెప్పారు. దీంతో 3 నెలల్లోగా నిపుణుల కమిటీని ఏర్పాటు చేయాలని పశుసంవర్ధక, బీసీ సంక్షేమ శాఖల ముఖ్యకార్యదర్శులకు జస్టిస్ భీమపాక నగేశ్ ఆదేశాలు జారీ చేశారు.