దహెగాం/నెన్నెల/వేమనపల్లి/కోటపల్లి/చింతలమానేపల్లి, జూలై 22: ఆసిఫాబాద్, మంచిర్యాల జిల్లాల్లో నాలుగు రోజులుగా కురిసిన వర్షాలకు నదులు, ప్రాజెక్టులు, వాగులు.. వంకలు ఉప్పొంగి ప్రవహిస్తుండగా.. పరీవాహక ప్రాంతాల్లోని పంటలు నీట మునిగాయి. దహెగాం మండలంలో ప్రాణహిత, పెద్దవాగు బ్యాక్వాటర్తో రావుపల్లి, మొట్లగూడ, రాంపూర్, దిగడల్లో వెయ్యి ఎకరాల పత్తి నీట మునిగింది. మంచిర్యాల జిల్లా నెన్నెల మండలంలో చేలల్లో ఇసుక మేటలు వేశాయి. మొలకలు కొట్టుకుపోయి నష్టం వాటిల్లింది. సోమవారం మండల వ్యవసాయ అధికారి శ్రీకాంత్ పంటలను పరిశీలించారు.
కల్లెంపల్లి, ముక్కిడిగూడెం, జాజులపేట, రాచర్ల సమీపంలో 400 ఎకరాల్లో పత్తి పంటలు మునిగిపోయాయి. కోటపల్లి మండలంవెంచపల్లి, సూపాక, ఆలుగామ, జనగామ, పుల్లగామ, సిర్సా, అన్నారం, ఎదుల్లబంధం, అర్జునగుట్టలో 864 ఎకరాల పంటలకు నష్టం జరిగినట్టు కోటపల్లి ఏవో తెలిపారు. కుమ్రం భీం ఆసిఫాబాద్ జిల్లాలో దిందా-కేతిని వాగు ప్రాణహితతోపాటు ఉధృతంగా ప్రవహిస్తుండటంతో దిందా నాలుగో రోజూ జలదిగ్బంధంలోనే ఉంది. గూడెం-అహేరి అంతర్రాష్ట్ర వంతెన వద్ద ప్రాణహిత నిండుగా ప్రవహిస్తున్నది. ప్రజలను అధికారులు అప్రమత్తం చేశారు. మత్స్యకారులు నదిలోకి చేపల వేటకు వెళ్లవద్దని అధికారులు హెచ్చరించారు.