Telangana | హైదరాబాద్, జూన్ 17 (నమస్తే తెలంగాణ): ఎట్టకేలకు వరుణుడు కరుణించాడు. హైదరాబాద్పై జోరు వాన కురిపించాడు. రాష్ట్రంలో పలు జిల్లాల్లో కూడా సోమవారం వర్షాలు కురిశాయి. తెలంగాణపై ఉపరితల ఆవర్తన ద్రోణి ఏర్పడిందని, దీని ప్రభావంతో మూడు రోజులపాటు తేలికపాటి నుంచి మోస్తరు వర్షాలు కురుస్తాయని హైదరాబాద్ వాతావరణ కేంద్రం తెలిపింది. కొన్ని ప్రాంతాల్లో ఉరుములు, మెరుపులతో గంటకు 30-40 కిలోమీటర్ల వేగంతో ఈదురుగాలులు వీచే అవకాశం ఉన్నట్ట పేర్కొన్నది. రాయలసీమ నుంచి మధ్య బంగాళాఖాతం వరకు సముద్రమట్టానికి 3.1 నుంచి 5.8 కిలోమీటర్ల ఎత్తు వరకు ఏర్పడిన ద్రోణి ప్రభావంతో ఉమ్మడి ఆదిలాబాద్, కరీంనగర్, ఖమ్మం, వరంగల్, నల్లగొండ, నిజామాబాద్, జగిత్యాల, రాజన్న సిరిసిల్ల, పెద్దపల్లి, సంగారెడ్డి, వికారాబాద్ జిల్లాల్లో ఈదురుగాలులతో వర్షాలు కురుస్తాయని వెల్లడించింది.
పలుచోట్ల పిడుగులు పడే అవకాశం ఉన్నదని, రైతులు, వ్యవసాయ కూలీలు చెట్ల కిందకు వెళ్లొద్దని వాతావరణశాఖ అధికారులు తెలిపారు. సూర్యాపేట, వికారాబాద్ జిల్లాలకు ఎల్లో అలర్ట్ జారీచేశారు. సోమవారం మధ్యాహ్నం వరకు ఎండ, ఉక్కపోత హైదరాబాదీలను ఉక్కిరిబిక్కిరి చేయగా, ఆ తర్వాత వాతావరణం ఒక్కసారిగా మారిపోయింది. నగరంలోని అన్ని ప్రాంతాల్లో వర్షం దంచి కొట్టింది. టోలిచౌకీ- ఎండీ లైన్స్ ఈదురుగాలులకు 200 సంత్సరాల నాటి చెట్టు నేలకొరిగింది. ఈ ఘటనలో ఓ వ్యక్తి తలకు గాయాలు కాగా, 4 ద్విచక్ర వాహనాలు ధ్వంసమయ్యాయి. భారీ వర్షం నేపథ్యంలో ప్రజలు అప్రమత్తంగా ఉండాలని మంత్రి పొన్నం ప్రభాకర్ కోరారు
166 మండలాల్లో-60% వర్షపాతం
రాష్ట్రవ్యాప్తంగా సోమవారం సగటున 6.0 మిల్లీమీటర్ల వర్షపాతం నమోదైనట్టు వాతావరణ శాఖ తెలిపింది. నిర్మల్ జిల్లాలో 18.8 మి.మీ, జయశంకర్ భూపాలపల్లిలో 17.1 మి.మీ, కుమ్రంభీం ఆసిఫాబాద్లో 14.6 మి.మీ, కామారెడ్డిలో 14.3 మి.మీ, హనుమకొండలో 12.3 మి.మీ, మెదక్లో 8.8 మి. మీ, ములుగులో 8.7 మి.మీ, మంచిర్యాలలో 4.5 మి.మీ చొప్పున వర్షపాతం నమోదైనట్టు వెల్లడించింది. జూన్ ఒకటి నుంచి 17వరకు ఏడు జిల్లాల పరిధిలోని 166 మండలాల్లో 60 శాతానికిపైగా వర్షపాతం నమోదైనట్టు ప్రకటించింది.
రాష్ట్రంలో 20 నుంచి వర్షాలు?:
రాష్ట్రంలో ఈ నెల 20 నుంచి వర్షాలు కురిసే అవకాశం ఉన్నదని ఇండో-జర్మన్ శాస్త్రవేత్తల బృందం అంచనా వేసింది. గ్లోబల్ వార్మింగ్తో రుతుపవనాలు మారుతున్నాయని బృందం పేర్కొన్నది. పశ్చిమ తెలంగాణలో 20 నుంచి, తూర్పు తెలంగాణలో 21, ఉత్తర తెలంగాణలో 22 నుంచి ఏకధాటిగా వర్షాలుంటాయని తెలిపింది.