నెట్వర్క్ మహబూబ్నగర్/బీబీపేట్, మే 20 : ఉమ్మడి మహబూబ్నగర్ జిల్లా వ్యాప్తం గా సోమవారం భారీ వర్షం కురిసింది. మహబూబ్నగర్ జిల్లా జడ్చర్ల పట్టణంలో లోతట్టు ప్రాంతాల్లోకి భారీగా నీరు చేరింది. బాదేపల్లి మార్కెట్యార్డులోని ధాన్యంతోపాటు కొనుగోలు చేసిన ధాన్యం బస్తాలు లారీల్లోకి ఎక్కిస్తుండగా తడిసినట్టు వ్యాపారులు తెలిపారు. జడ్చర్ల ఫ్లైఓవర్, పట్టణ ప్రధాన రహదారిపై, ఆలూర్ రైల్వే అండర్ బ్రిడ్జి కిందికి నీరు చేరి వాహనాల రాకపోకలు నిలిచిపోయాయి. ఈదురుగాలులకు పలుచోట్ల విద్యుత్తు సరఫరాలో అంతరాయం ఏర్పడింది. జోగుళాంబ గద్వాల జిల్లా ఉండవెల్లి మండలం బొంకూరులో చెట్లు, విద్యుత్తు స్తంభాలు నేలకొరిగాయి. తిమ్మాజిపేట నుంచి జడ్చర్ల-నాగర్కర్నూల్ దారిలో ఇంద్రానగర్, తండా సమీపంలో చెట్లు విరిగి రోడ్డుపై పండటంతో ట్రాఫిక్ స్తంభించిపోయింది. అచ్చంపేట బస్టాండ్లో భారీగా నీరు నిలిచింది. నాగర్కర్నూల్ మండలం గన్యాగుల గ్రామంలో పిడుగుపాటుకు ఆరు గొర్రెలు, రెండు పొట్టేళ్లు మృతి చెందాయి.
ధాన్యం కొనడం లేదని రైతుల ఆందోళన
అకాల వర్షాలకు వడ్లు తడిసి మొలకలు వస్తున్నా అధికారులు, ప్రజాప్రతినిధులు పట్టించుకోవడం లేదని రైతులు రోడ్డుపై బైఠాయించారు. కామారెడ్డి జిల్లా బీబీపేట్ మండలంలో ధాన్యం కొనుగోళ్లలో తీవ్ర జాప్యం జరుగుతున్నదని మల్కాపూర్కు చెందిన రైతు లు బీబీపేట్ మండల కేంద్రంలో రాస్తారోకో చేశారు. సొసైటీ సిబ్బంది నిర్లక్ష్యం వహిస్తున్నారని మండిపడ్డారు. వర్షానికి తడిసి ముద్దయిన వడ్లు మొలకెత్తి తీవ్రంగా నష్టాపోతున్నామని ఆవేదన వ్యక్తంచేశారు. డీసీఎంఎస్ ఇన్చార్జి చైర్మన్ ఇంద్రాసేనారెడ్డి అక్కడకు చేరుకుని లారీల కొరత వల్ల ఇబ్బందులు వస్తున్నాయని, వారంలోపు ధాన్యాన్ని తరలిస్తామని హామీ ఇవ్వడంతో రైతులు శాంతించారు.