హైదరాబాద్, మే 27 (నమస్తే తెలంగాణ): ప్రభుత్వ దవాఖానల్లో ఔషధాల కొర త ఉండొద్దని అధికారులను వైద్యారోగ్య శాఖ మంత్రి దామోదర రాజనర్సింహా ఆదేశించినట్టు తెలిసింది. అత్యవసర ఔషధాల నిల్వపై నిరంతరం నిఘా ఉంచాలని స్పష్టం చేసినట్టు సమాచారం. సోమవారం హైదరాబాద్ కోఠిలోని టీఎస్ఎంఎస్ఐడీసీ కార్పొరేషన్ కార్యాలయంలో ఉన్నతాధికారులతో మంత్రి సమీక్షించారు.
దవాఖానల్లో మందుల కొరతపై ఇటీవల ‘నమస్తే తెలంగాణ’లో కథనం ప్రచురితమైన విషయం తెలిసిందే. ఈ నేపథ్యంలో పీహెచ్సీలు మొదలు సూపర్స్పెషాలిటీ దవాఖానల వరకు ఔషధాల నిల్వలు, పెండింగ్ బిల్లులపై మంత్రి ఆరా తీసినట్టు సమాచారం. ఔషధాల కొరత లేకుండా చూడాలని, పెం డింగ్ బిల్లులపై ఎన్నికల కోడ్ ముగిసిన తర్వా త నిర్ణయం తీసుకుంటామని చెప్పినట్టు తెలిసింది. డయాలసిస్ కేంద్రాలు, తెలంగాణ డయాగ్నోస్టిక్స్ (టీ హబ్స్), తొమ్మిది కొత్త మెడికల్ కాలేజీలు, వరంగల్, హైదరాబాద్ లో 4 సూపర్ స్పెషాలిటీ హాస్పిటళ్ల నిర్మాణంపై సమీక్ష నిర్వహించినట్టు సమాచారం.