హైదరాబాద్: యోగాను ప్రతి ఒక్కరు దినచర్యలో భాగం చేసుకోవాలని వైద్య ఆరోగ్య శాఖ మంత్రి దామోదర రాజనర్సింహ (Damodara Raja Narasimha) అన్నారు. ప్రపంచానికి భారతదేశం ఇచ్చిన వరం యోగ అని చెప్పారు. ఇది మన పూర్వీకులు ఇచ్చిన చారిత్రక సంపదని తెలిపారు. యోగ సాధన వల్ల శారీరకంగా, మానసికంగా, ఆధ్యాత్మికంగా ఆరోగ్య సమతుల్యత ఏర్పడుతుందన్నారు. ప్రపంచ యోగా దినోత్సవాన్ని పురస్కరించుకొని రాష్ట్రవ్యాప్తంగా జూన్ 21న రాష్ట్రంలోని అన్ని పాఠశాలు, కళాశాలలో ఘనంగా నిర్వహించాలని చెప్పారు.
యోగా దినోత్సవంలో ప్రతి ఒక్కరు భాగస్వామ్యాలు కావాలని పిలుపునిచ్చారు. ప్రపంచ యోగ దినోత్సవాన్ని పురస్కరించుకొని ఆయుష్ శాఖ ఆధ్వర్యంలో హైదరాబాద్ నెక్లెస్ రోడ్లో నిర్వహించిన కర్టెన్ రైజర్ కార్యక్రమంలో పచ్చజెండా ఊపి యోగ వాక్ను మంత్రి ప్రారంభించారు. ఈ కార్యక్రమంలో రాష్ట్ర ఆయుష్ శాఖ కమిషనర్ ప్రశాంతి, డైరెక్టర్ పాణికిరణ్, నేచురపతి, హోమియోపతి విద్యార్థులు పెద్ద సంఖ్యలో పాల్గొన్నారు.