సిద్దిపేట: ప్రభుత్వం బేషజాలకు పోకుండా కాళేశ్వరం ప్రాజెక్టు నుంచి నీటిని తీసుకొచ్చి చెరువులు, కుంటలు నింపాలని మాజీ మంత్రి హరీశ్ రావు (Harish Rao) డిమాండ్ చేశారు. మేడిగడ్డ వద్ద 40 వేల క్యూసెక్కుల నీరు ప్రవహిస్తున్నదని చెప్పారు. బ్యారేజీ గేట్లు తెరిచి ఉన్నప్పట్టికీ గోదావరిలో ఉన్న నీటి ప్రవాహానికి అనుగుణంగా నాలుగు మోటార్లు నడిపించుకునే అవకాశం ఉందన్నారు. ఆషాఢ బోనాల సందర్భంగా సిద్దిపేట జిల్లా గజ్వేల్లో మహంకాళి అమ్మవారిని హరీశ్ రావు దర్శించుకున్నారు. అనంతరం మీడియాతో మాట్లాడుతూ.. రాష్ట్రంలో ఈసారి వర్షాభావ పరిస్థితులు నెలకొన్నాయని, రైతులంతా కళ్లల్లో ఒత్తులు వేసుకుని వర్షాల కోసం ఎదురుచూస్తున్నారన్నారు.
కాళేశ్వరం ప్రాజెక్టు నుంచి నీటిని తీసుకొచ్చే అవకాశం ఉందని చెప్పారు. ఈ కరువు పరిస్థితుల్లో కాళేశ్వరం నీటిని తీసుకొచ్చి చెరువులు, కుంటలు నింపుకుంటే రైతాంగానికి మేలు జరుగుతుందన్నారు. ప్రభుత్వం పంతాలు, పట్టింపులకు పోకుండా కాళేశ్వరం నుంచి మిడ్మానేరు, అనంతగిరి, రంగనాయక సాగర్, మల్లన్నసాగర్, కొండపోచమ్మ సాగర్ జలాశయాలను నింపాలన్నారు. వాటి ద్వారా చెరువులు నింపే కార్యక్రమాన్ని చేపట్టాలని ప్రభుత్వాన్ని కోరారు.