నల్లగొండ: పట్టభద్రుల ఎమ్మెల్సీ ఫలితం (Graduate MLC Bypoll) ఉత్కంఠ రేపుతున్నది. రెండో ప్రాధాన్యత ఓట్ల లెక్కింపు పూర్తయినప్పటికీ ఫలితం ఇంకా తేలలేదు. కాంగ్రెస్ అభ్యర్థి తీన్మార్ మల్లన్న ఆధిక్యంలో కొనసాగుతున్నారు. ఇప్పటివరకు ఆయనకు 1,23,210 ఓట్లు వచ్చాయి. విజయం సాధించాలంటే మరో 32 వేల ఓట్లు అవసరమున్నది. ఇక రెండో స్థానంలో ఉన్న బీఆర్ఎస్ అభ్యర్థి రాకేశ్ రెడ్డికి 1,04,514 ఓట్లు వచ్చాయి. బీజేపీ బలపరిచిన ప్రేమేందర్ రెడ్డికి 43,486, స్వతంత్ర అభ్యర్థి అశోక్ గౌడ్కు 29,776 ఓట్లు పోలయ్యాయి.
రెండో ప్రాధాన్యత ఓట్ల లెక్కింపులో 33 మంది అభ్యర్థులు ఎలిమినేట్ అయ్యారు. 33 మంది అభ్యర్థుల రెండో ప్రాధాన్యత ఓట్లలో కాంగ్రెస్, బీఆర్ఎస్ అభ్యర్థులకు పోటాపోటీగా ఓట్లు షేర్ అయ్యాయి. కాగా, బీజేపీ అభ్యర్థి ఎలిమినేషన్ తర్వాతే ఫలితంపై స్పష్టత వచ్చే అవకాశం ఉన్నది. మ్యాజిక్ ఫిగర్కు 1,55,095 ఓట్లు రావాల్సి ఉన్నది. శుక్రవారం సాయంత్రం తర్వాత తుది ఫలితం రానుంది.