CM Revanth Reddy | హైదరాబాద్, జూలై 17(నమస్తే తెలంగాణ): రైతులకు రూ.2 లక్షల రుణమాఫీని మూడు విడతల్లో పూర్తి చేస్తామని ముఖ్యమంత్రి రేవంత్రెడ్డి తెలిపారు. గురువారం రూ.లక్ష వరకు, నెలాఖరులోగా రూ.1.5 లక్షల వరకు, ఆగస్టులో రూ.2 లక్షల వరకు రుణమాఫీ చేస్తామని స్పష్టంచేశారు. బుధవారం ఆయన ప్రజాభవన్లో డిప్యూటీ సీఎం భట్టి విక్రమార్కతో కలిసి మంత్రులు, కాంగ్రెస్ ఎమ్మెల్యేలు, ఎమ్మెల్సీలు, ఎంపీలు, ఇతర నేతలతో సమన్వయ సమావేశం నిర్వహించారు. ఈ సందర్భంగా సీఎం రేవంత్రెడ్డి మాట్లాడుతూ.. రైతులకు కాంగ్రెస్ పార్టీ అగ్రనేత రాహుల్గాంధీ ఇచ్చిన హామీ మేరకు రుణమాఫీ చేస్తున్నట్టు తెలిపారు.
ఆగస్టు 15లోపు రూ.2 లక్షల రుణమాఫీ చేస్తామని హామీ ఇస్తే ఆర్థిక నిపుణులు కష్టమని అన్నారని, కానీ దానిని ఇప్పుడు నిజం చేసి చూపిస్తున్నామని చెప్పారు. పదేండ్లు అధికారంలో ఉన్న బీఆర్ఎస్ రూ.28 వేల కోట్లు కూడా రైతు రుణమాఫీ చేయలేకపోయిందని అన్నారు. రాష్ట్రంలో కాంగ్రెస్ పార్టీ చేస్తున్న రుణమాఫీ దేశానికి ఆదర్శంగా నిలుస్తుందని, దేశ వ్యవసాయ విధానంలో మాడల్గా నిలుస్తుందని పేర్కొన్నారు. తన జీవితంలో ఈ రోజు ఎప్పటికీ గుర్తుండిపోతుందని ఆనందం వ్యక్తంచేశారు.
గురువారం సాయంత్రం 4 గంటలకు రాష్ట్రవ్యాప్తంగా రూ.లక్ష వరకు గల రుణాలను మాఫీ చేస్తామని, మొత్తం రూ.7వేల కోట్లు రైతుల ఖాతాల్లో నేరుగా జమ చేస్తామని తెలిపారు. రుణమాఫీపై జాతీయస్థాయిలో చర్చ జరిగేలా చేయాలని పార్టీ ఎంపీలకు దిశానిర్దేశం చేశారు. దేశంలో ఏ రాష్ట్రంలో కూడా ఒకే విడతలో రూ.31 వేల కోట్లతో రుణమాఫీ చేయలేదని స్పష్టంచేశారు. రుణమాఫీ తర్వాత గ్రామాల్లో, మండల కేంద్రాల్లో కూడలి నుంచి రైతు వేదికల వరకు బైక్ ర్యాలీలు నిర్వహించాలని, ఎమ్మెల్యేలు నియోజకవర్గ కేంద్రాల్లో జరిగే కార్యక్రమాల్లో పాల్గొనాలని సూచించారు. రాష్ట్రంలో రుణమాఫీ సందర్భంగా ఎకడికకడ ఒక పండగ వాతావరణం ఉండాలని, సంబురాలు చేయాలని పిలుపునిచ్చారు.
రుణమాఫీ కార్యక్రమం అమలు చేసేందుకు నిద్రలేని రాత్రులు గడిపామని, రూపాయి రూపాయి పోగుచేసి రుణమాఫీ చేస్తున్నట్టు డిప్యూటీ సీఎం మల్లు భట్టివిక్రమార్క తెలిపారు. అన్ని కుటుంబాలకు రుణమాఫీ చేస్తామని, రేషన్కార్డులు లేని ఆరు లక్షల మంది రైతు కుటుంబాలకు కూడా రుణమాఫీ అందిస్తామని హామీ ఇచ్చారు. ఈ కార్యక్రమాన్ని ప్రతి పోలింగ్ బూతు, ప్రతి ఓటర్ దగ్గరకు తీసుకెళ్లాలని కార్యకర్తలకు పిలుపునిచ్చారు. ఎన్ని ఆర్థిక ఇబ్బందులు ఉన్నప్పటికీ అధికారంలోకి వచ్చిన కొద్దికాలంలోనే ఐదు హామీలు అమలుచేస్తున్నామని చెప్పారు. అయితే అనుకున్నంతగా ఈ పథకాలు క్షేత్రస్థాయిలో ప్రచారం జరగడం లేదని ఆవేదన వ్యక్తంచేశారు.
బ్యాంకుల్లో రూ.2 లక్షల్లోపు పంట రుణాలు తీసుకున్న రైతులందరికీ రుణమాఫీ చేస్తామని కాంగ్రెస్ పార్టీ ఎన్నికల సమయంలో హామీ ఇచ్చింది. అధికారంలోకి వచ్చిన తరువాత రుణమాఫీని వర్తింపచేయడానికి పలు రకాల నిబంధనలు పెడుతున్నారు. ఈ విధంగా షరతులు పెట్టడం సమంజసం కాదు. పంట రుణాలు తీసుకున్న రైతులందరికీ ప్రభుత్వం రుణమాఫీ చేయాలి. అదేవిధంగా రూ.2 లక్షలలోపు తీసుకున్న రుణాలను ఒకేసారి మాఫీ చేస్తే బాగుంటుంది.
-శేరి నారాయణరెడ్డి, చౌదర్పల్లి
బ్యాంకుల్లో పంట రుణాలు తీసుకున్న రైతులందరికీ రుణమాఫీని వర్తింపచేసి న్యాయం చేయాలి. రేషన్కార్డు ఉన్నవారికే రుణమాఫీ వర్తిస్తుందన్న షరతులు విధించడం సరికాదు. ఎక్కువ విస్తీర్ణం భూమి ఉన్న రైతులకు రేషన్కార్డులు ఉండవు. అటువంటి రైతులు నష్టపోయే అవకాశం ఉంది. ప్రభుత్వం విడుదల చేసిన మార్గదర్శకాలు స్పష్టంగా లేక రైతుల్లో గందరగోళం నెలకొన్నది.
-శ్యామలయ్యగౌడ్, రేగడిమైలారం