హైదరాబాద్: రాష్ట్రంలో వినాయక చవితి అంటే మొదట గుర్తొచ్చేది హైదరాబాద్లోని ఖైరతాబాద్ గణేశుడు (Khairatabad Ganesh). ఏటా విభిన్న రూపాల్లో దర్శణమిచ్చే మహా గణపతి ఈ ఏడాది శ్రీ దశ మహా విద్యాగణపతిగా భక్తులను కనువిందుచేయనున్నాడు. ఉదయం 10.30 గంటలకు తొలి పూజ ప్రారంభం కానుంది. మరికాసేపట్లో గణేశుడికి ప్రాణప్రతిష్ఠ, కలశపూజ చేయనున్నారు. ఉదయం 11 గంటలకు గవర్నర్ తమిళిసై (Governor Tamilisai) ఖైరతాబాద్ గణేశుడిని దర్శించుకోనున్నారు. అదేవిధంగా హర్యానా గవర్నర్ బండారు దత్తాత్రేయ, మంత్రి తలసాని శ్రీనివాస్ యాదవ్, స్థానిక ఎమ్మెల్యే దానం నాగేందర్ తొలి పూజల్లో పాల్గొననున్నారు.
63 అడుగుల ఎత్తు, 28 అడుగుల వెడల్పు ఉన్న మహా గణపతి విగ్రహాన్ని మట్టితో తయారుచేశారు. మండపానికి రెండు వైపులా ఇతర విగ్రహాలను ఏర్పాటు చేశారు. కుడివైపు శ్రీ పంచముఖ లక్ష్మీ నారసింహస్వామి, ఎడమవైపు శ్రీ వీరభద్ర స్వామి విగ్రహాలను 15 అడుగుల ఎత్తున ఏర్పాటు చేశారు. కాగా, ఖైరతాబాద్ లంబోదరుడిని దర్శించుకునేందుకు పెద్ద సంఖ్యలో భక్తులు తరలివస్తున్నారు. సోమవారం ఉదయం నుంచి భక్తుల రద్దీ మొదలైంది. ఈ నేపథ్యంలో దర్శనానికి వచ్చే భక్తులకు ఇబ్బంది లేకుండా నిర్వాహకులు ఏర్పాట్లు చేశారు. వినాయక మండపం పరిసర ప్రాంతాల్లో పోలీసులు పటిష్ఠ బందోబస్తు ఏర్పాటు చేశారు.