వ్యవసాయ యూనివర్సిటీ, జూన్ 10: రంగారెడ్డి జిల్లా రాజేంద్రనగర్లోని ప్రొఫెసర్ జయశంకర్ రాష్ట్ర వ్యవసాయ విశ్వవిద్యాలయం ఆరో స్నాతకోత్సవం సోమవారం విశ్వవిద్యాలయం ఆడిటోరియంలో ఘనంగా జరిగింది. ఈ కార్యక్రమానికి హాజరైన గవర్నర్, పీజేటీఎస్ ఏయూ కులపతి సీపీ రాధాకృష్ణన్ మాట్లాడుతూ మానవ మనుగడకు వ్యవసాయమే ప్రధాన ఆధారమని అన్నారు.
వ్యవసాయానికి కీలకం విత్తనమని పీజేటీఎస్ ఏయూ మెరుగైన వంగడాలను రైతాంగానికి అందిస్తుండడం హర్షదాయకమని కొనియాడారు. ఎస్బీఐ మేనేజింగ్ డైరెక్టర్ చల్లా శ్రీనివాసులు శెట్టి మాట్లాడుతూ వాతావరణ మార్పులకు అనుగుణంగా వ్యవసాయరంగ అభివృద్ధికి అధునాతన టెక్నాలజీ దోహదం చేయాలని సూచించారు. వ్యవసాయంతో పాటు చేపల పెంపకం, నూనెగింజల ఉత్పత్తి, పౌల్ట్రీ రంగ అభివృద్ధితో దేశంలో ఇంద్రధనస్సు విప్లవం సాగుతుందని చెప్పారు.
దేశ జనాభాలలో 46శాతం వ్యవసాయ అనుబంధ రంగాలపై ప్రత్యక్షంగా, పరోక్షంగా ఆధారపడి, దేశ జీడీపీలో వ్యవసాయ రంగం వాటా దాదాపు 18 శాతమేనని ఆయన వివరించారు. దేశంలో వ్యవసాయ స్టార్టప్ల ప్రాధాన్యం పెరిగిందని యువత అగ్రిప్రెన్యూర్స్గా మారాలని ఆయన కోరారు. రాష్ట్ర వ్యవసాయ కార్యదర్శి, పీజేటీఎస్ఏయూ ఉపకులపతి ఎం రఘునందన్ రావు మాట్లాడుతూ ఆరేండ్లలో విశ్వవిద్యాలయం ప్రగతిని వివరించారు.
ప్రతిభ కనబర్చిన 587 మంది విద్యార్థులకు అండర్ గ్రాడ్యుయేట్ పట్టాలు, 165 మందికి పీహెచ్డీ విద్యార్థుల్లో 12 బంగారు పతకాలను, 8 మంది యూజీ విద్యార్థులు 19 బంగారు పతకాలను సాధించారు. బుజ్జూరి దివ్య, వెలిచాల సాయి ప్రత్యూష చెరొక ఆరు బంగారు పతకాలను సాధించారు. కార్యక్రమంలో విశ్వవిద్యాలయం రిజిస్ట్రార్ డాక్టర్ పీ రఘురామిరెడ్డి, వర్సిటీ అధికారులు, బోర్డు సభ్యులు, అకాడమిక్ కౌన్సిల్ సభ్యులు, విశ్వవిద్యాలయం పూర్వ ఉపకులపతులు, అధికారులు, బోధనా బోధనేతర సిబ్బంది, విద్యార్థులు వారి తల్లిదండ్రులు పాల్గొన్నారు.