పరకాల/పాల్వంచ/మక్తల్, జూలై 25: వేర్వేరు జిల్లాల్లో వివిధ శాఖల్లో విధులు నిర్వహిస్తున్న ముగ్గురు ప్రభుత్వ అధికారులు గురువారం లంచం తీసుకుంటూ ఏసీబీ అధికారులకు రెడ్హ్యాండెడ్గా పట్టుబడ్డారు. అందులో ఒకరు హనుమకొండ జిల్లా పరకాల సబ్ రిజిస్ట్రార్, మరొకరు భద్రాద్రి కొత్తగూడెం జిల్లా పాల్వంచ పట్టణం ఎస్సై, ఇంకొకరు నారాయణపేట జిల్లా మక్తల్ తహసీల్దార్ కార్యాలయంలో పనిచేస్తున్న సర్వేయర్ ఉన్నారు. ఏసీబీ డీఎస్పీలు మీడియాకు వివరాలు వెల్లడించారు.
పరకాల మున్సిపాలిటీ విలీన గ్రామమైన సీతారాంపురానికి చెందిన అన్నదమ్ము లు లడే శ్రీనివాస్, శ్రీకాంత్.. తల్లిదండ్రుల పేరుతో 481/సీ సర్వేనంబర్లో ఉన్న నాలు గు గుంటల భూమిని తమ పేరుమీద రెండు సమ భాగాలుగా గిఫ్ట్ రిజిస్ట్రేషన్ చేసుకునేందుకు ప్రైవేట్ డాక్యుమెంట్ రైటర్ బొట్ల నరేశ్ను సంప్రదించారు. విషయాన్ని సబ్ రిజిస్ట్రార్ సునీత దృష్టికి తీసుకెళ్లగా.. ఆమె రూ.80 వేలు డిమాండ్ చేశారు. దీంతో బాధితులు ఏసీబీని ఆశ్రయించారు. ప్లాన్ ప్రకారం.. వా రు గురువారం సబ్ రిజిస్ట్రార్ కార్యాలయానికి వెళ్లి ప్రైవేట్ డాక్యుమెంట్ రైటర్కు రూ.80 వేల నగదు ఇచ్చారు. ఏసీబీ డీఎస్పీ సాంబ య్య ఆధ్వర్యంలో ఇన్స్పెక్టర్లు శ్యాం, రాజు ప్రైవేట్ డాక్యుమెంట్ రైటర్ నరేశ్ నుంచి రూ.80 వేలు స్వాధీనం చేసుకున్నారు.
2 గంటల పాటు సబ్ రిజిస్ట్రార్ కార్యాలయంలో తనిఖీలు చేపట్టి సబ్ రిజిస్ట్రార్ సునీత, ప్రైవేట్ డాక్యుమెంట్రైటర్ బొట్ల నరేశ్ను అదుపులోకి తీసుకున్నారు. భద్రాద్రి కొత్తగూడెం జిల్లా పాల్వంచలో ఓ కేసు విషయమై న్యాయవాది నుంచి ఎస్సై రూ.20 వేలు లంచం తీసుకుంటుండగా పట్టుకున్నట్టు ఏసీబీ డీఎస్పీ రమేశ్ తెలిపారు. పాల్వంచకు చెందిన సీరపు శ్రావణి కొత్తగూడెంకు చెందిన బాలసాని గణేశ్గౌడ్కు రూ.20 వేలు అప్పుగా ఇచ్చింది. అనంతరం గణేశ్గౌడ్ మరణించగా.. డబ్బులు ఇవ్వాలని అతడి కుటుంబ సభ్యులపై కొత్తగూడెం కోర్టు లో శ్రావణి కేసు వేసింది. కోర్టులో చార్జిషీట్ దాఖలు చేయడానికి ఎఫ్ఐఆర్ కాపీ కావాలని శ్రావణి తరఫు న్యాయవాది ఎస్సైని సంప్రదించగా.. డబ్బులు డిమాండ్ చేశారు.
ఏసీబీ అధికారుల ప్లాన్ ప్రకారం.. న్యాయవాది లక్ష్మారెడ్డి పాల్వంచలోని ఎస్సై రాము ఇంటికి వచ్చి రూ.20 వేలు ఇస్తుండగా ఏసీబీ అధికారులు పట్టుకున్నారు. మరో ఘటనలో.. నారాయణపేట జిల్లా మక్తల్కు చెందిన రైతు గాసం వెంకటేశ్.. మంతన్గోడ్ గ్రామ సమీపంలో సర్వేనెంబర్ 107, 121లో 17 ఎకరాల భూమి సర్వే చేయాలని ఈ ఏడాది ఏప్రిల్ 22న మీ సేవలో డబ్బులు చెల్లించాడు. సర్వేయర్ బాలరాజు జూన్ 26న పొలం వద్ద సర్వేకు వెళ్లాడు. హద్దులు నిర్ణయించేందుకు మ్యాప్ తీసుకొస్తానని చెప్పి రైతు వద్ద రూ.3 వేలు తీసుకున్నాడు. తర్వాత రూ.12 వేలు ఖర్చు అవుతుందని, ఇప్పటికి రూ.3 వేలు ఇచ్చావు.. మరో రూ.9 వేలు ఇవ్వాలని డిమాండ్ చేశాడు. చేసేది లేక ఏసీబీ అధికారుల సాయంతో గురువారం సాయంత్రం సర్వేయర్కు రూ.9 వేలు ఇస్తుండగా పట్టుకున్నారు. ఇప్పటి వరకు సర్వేయర్ బాలరాజు మూడుసార్లు ఏసీబీ అధికారులకు పట్టుబడ్డాడు. డీఎస్పీ శ్రావణ కృష్ణగౌడ్, ఎస్సై లు ఖాదర్ జిలానీ, లింగయ్య, పాల్గొన్నారు.