చేర్యాల, ఫిబ్రవరి 18: సిద్దిపేట జిల్లాలో ఒకే కుటుంబంలో ముగ్గురు సర్కారు కొలువు సాధించి ఔరా అనిపించారు. సిద్దిపేట జిల్లా చేర్యాల మండలం కడవేర్గుకు చెందిన రైతు దంపతులు గర్నేపల్లి యాదలక్ష్మి, అంజయ్యది మధ్యతరగతి వ్యవసాయం కుటుంబం. ఈ దంపతులకు ముగ్గురు సంతానం. పెద్ద కొడుకు గర్నేపల్లి ప్రశాంత్ ఇంజినీరింగ్ పూర్తి చేసి మొదట కేంద్ర ప్రభుత్వ ఎలక్ట్రానిక్ కార్పొరేషన్ ఆఫ్ ఇండియా లిమిటెడ్లో ఒప్పంద ఉద్యోగిగా పనిచేశాడు. ఆ తర్వాత బీఆర్ఎస్ హయాంలో పంచాయతీ కార్యదర్శి ఉద్యోగానికి ఎంపికై జగదేవ్పూర్ మండలంలో విధులు నిర్వహిస్తున్నాడు. చిన్నకుమారుడు గర్నేపల్లి అనిల్కుమార్ సీఏ పూర్తిచేసి జల రవాణా శాఖలో అకౌంట్ ఆఫీసర్గా గుజరాత్లోని వడోదరలో జాబ్ చేశాడు. ఆయన ఓబీసీ కోటాలో ఆలిండియా రెండో ర్యాంకు సాధించి ఉద్యోగం పొందాడు. తర్వాత కేసీఆర్ ప్రభుత్వం నిర్వహించిన ఎలక్ట్రిసిటీ డిపార్ట్మెంట్లో అకౌంట్ ఆఫీసర్గా నియమితులై జనగామలో విధులు నిర్వహిస్తున్నాడు. కుమార్తె గర్నేపల్లి వనజ డీఈడీ చదివి 2018లో సమగ్ర శిక్షా అభియాన్ ఇచ్చిన నోటిఫికేషన్ ద్వారా ప్రతిభ చూపి రాష్ట్ర ప్రభుత్వ విద్యాశాఖలో స్పెషల్ టీచర్గా సిద్దిపేట జిల్లా మర్కూక్ మండలంలో విధులు నిర్వహిస్తున్నది. పెద్ద కుమారుడు గర్నేపల్లి ప్రశాంత్ భార్య దీక్ష ఉస్మానియా నుంచి జీఎన్ఎం, ఫార్మసీ చదవి నిరుడు బీఆర్ఎస్ సర్కారు నిర్వహించిన నర్సింగ్ ఆఫీసర్ రిక్రూట్మెంట్లో మూడో జోన్లో 12వ ర్యాంకు సాధించి మెరిట్తో సిద్దిపేట మెడికల్ కాలేజీలో ఇటీవల పోస్టింగ్ పొంది విధులు నిర్వహిస్తున్నది. చిన్న కుమారుడు అనిల్కుమార్ భార్య ప్రత్యూష ఇంజినీరింగ్ పూర్తిచేసి యూనియన్ బ్యాంక్ ఆఫ్ ఇండియాలో క్లర్క్ ఉద్యోగం సాధించి ప్రస్తుతం జనగామ జిల్లా దేవరుప్పులలో విధులు నిర్వహిస్తున్నది. ఇలా ఒకే కుటుంబానికి చెందిన ఐదుగురు ప్రభుత్వ ఉద్యోగాలు చేస్తుండటంతో గ్రామస్థులతోపాటు బంధువులు వారిని అభినందిస్తున్నారు.