Musi River | సిటీబ్యూరో, జనవరి 5 (నమస్తే తెలంగాణ):అహ్మదాబాద్లోని సబర్మతి నది తరహాలో మూసీ పరివాహక ప్రాంతాన్ని తీర్చిదిద్దేందుకు రాష్ట్ర ప్రభుత్వం చర్యలు చేపట్టింది. ఇటీవల మూసీ నది సుందరీకరణపై ఉన్నతాధికారులతో ప్రత్యేక సమీక్ష జరిపిన సీఎం రేవంత్రెడ్డి.. వివిధ అంశాలపై సుదీర్ఘంగా చర్చించారు. సుమారు 55 కి.మీ మేర మూసీ నది పరివాహక ప్రాంతాన్ని అభివృద్ధి చేయాలని లక్ష్యాలను నిర్దేశించారు. అన్ని వర్గాల ప్రజలకు అనువైన ఐకానిక్ డిజైన్ ఇందుకోసం ఎంపిక చేయాలని అధికారులకు సూచించారు. విదేశాలతో పాటు దేశంలోని ఇతర రాష్ర్టాల్లో నదీ పరివాహక ప్రాంతాల్లో ఇప్పటికే చేపట్టిన ప్రాజెక్టుల డిజైన్లను పరిశీలించాలన్నారు. ఆకస్మిక వరదలు వచ్చినా తట్టుకునే విధంగా వర్షపు నీటిని మూసీలోకి మళ్లించేలా చర్యలు తీసుకోవాలన్నారు. ఇందులోభాగంగా ఎంఆర్డీసీ ఎండీ, హెచ్ఎండీఏ జేసీ ఆమ్రపాలి రెండురోజుల పాటు అహ్మదాబాద్ పర్యటనకు వెళ్లారు. అక్కడి సబర్మతి నది తీర ప్రాంతాన్ని ఆ రాష్ట్ర ప్రభుత్వం అభివృద్ధి చేసిన తీరు, తీసుకున్న చర్యలు, ఇతర అంశాలను సమగ్రంగా అధ్యయనం చేయనున్నారు.
మూసీ పరివాహక ప్రాంతం సుందరీకరణపై కాంగ్రెస్ ప్రభుత్వం ప్రత్యేకంగా దృష్టి సారించింది. గుజరాత్లోని అహ్మదాబాద్ నగరంలో ఉన్న సబర్మతి నది తరహాలో తీర్చిదిద్దేలా ప్రణాళికలను వేగవంతం చేసింది. ఈ నేపథ్యంలోనే మూసీ రివర్ ఫ్రంట్ డెవలప్మెంట్ కార్పొరేషన్ (ఎంఆర్డీసీ) డైరెక్టర్గా సీనియర్ ఐఏఎస్ అధికారి అమ్రపాలిని ఇటీవల నియమించింది. వారం రోజుల కిందట మూసీ రివర్ ఫ్రంట్ అభివృద్ధిపై ప్రత్యేకంగా సమీక్ష జరిపిన సీఎం రేవంత్ రెడ్డి లక్ష్యాలను నిర్ధేశించారు. ఇందులో భాగంగానే ఎంఆర్డీసీ డైరెక్టర్, హెచ్ఎండీఏ జాయింట్ కమిషనర్ అమ్రపాలి రెండు రోజుల క్రితమే అహ్మదాబాద్ పర్యటనకు వెళ్లారు. ఆ నగరంలో ఉన్న సబర్మతి నది తీర ప్రాంతంలో అక్కడి ప్రభుత్వం అభివృద్ధి చేసిన తీరును, తీసుకున్న చర్యలు, ఇతర అంశాలను సమగ్రంగా అధ్యయనం చేయనున్నారు. ఈ ప్రాజెక్టును పూర్తి చేస్తే హైదరాబాద్ మహానగర రూపురేఖలే మారిపోయే ప్రాజెక్టు కావడంతో ప్రభుత్వం దీన్ని 36 నెలల్లోనే పూర్తి చేయాలని లక్ష్యాన్ని పెట్టుకున్నది. పీపీపీ పద్ధతిలో ఈ ప్రాజెక్టును చేపట్టేందుకు అవసరమైన ప్రణాళికలను సిద్ధం చేసుకోవాలని సీఎం రేవంత్ రెడ్డి ఆదేశించారు.
గతంలోనే సమగ్ర సర్వేలు, అధ్యయనాలు
మూసీ సుందరీకరణపై గత కేసీఆర్ ప్రభుత్వం పూర్తి స్థాయిలో అధ్యయనం చేసి అభివృద్ధి ప్రణాళికలు సిద్ధం చేసింది. మూసీ నది పరివాహక ప్రాంతాన్ని 40 కి.మీ పొడవునా సుందరీకరణ పనులు చేసేందుకు మొదట డ్రోన్ సర్వే చేపట్టింది. ఆ తర్వాత దేశ, విదేశాలకు చెందిన కన్సల్టెంట్ల అంతర్జాతీయ ప్రమాణాలతో కూడిన డిజైన్లను రూపొందించి పెట్టారు. హెచ్ఎండీఏ, జీహెచ్ఎంసీ అధికారులు పలుమార్లు గుజరాత్లోని సబర్మతీ నది అభివృద్ధిని అధ్యయం చేసేందుకు వెళ్లి వచ్చారు. అదేవిధంగా విదేశాల్లోనూ నగరంలోని నదీ పరివాహక ప్రాంతాల అభివృద్ధి ఎలా చేశారన్న దానిపైనా అధ్యయనం చేసి వచ్చారు. ఇలా మూసీ సుందరీకరణకు గత కేసీఆర్ ప్రభుత్వం అన్ని కోణాల్లో అధ్యయనం చేయడంతో పాటు అందరికీ అమోదయోగ్యంగా ఉండేలా, ఆదాయ వనరుగా మార్చేందుకు ప్రభుత్వ, ప్రైవేటు భాగస్వామ్యంలో మూసీ సుందరీకరణ ప్రాజెక్టును చేపట్టాలని అంతా సిద్ధం చేశారు. కేవలం సుందరీకరణ మాత్రమే కాకుండా మూసీ నదిని వైవిధ్యంగా, విభిన్నంగా, కొత్త సొబగులతో అలరించేలా ట్రాఫిక్ చిక్కులు తీర్చడంతో పాటు ఇటు హైదరాబాద్ నగరం, తెలంగాణ రాష్ట్ర సంస్కృతీ, సంప్రదాయాలు ప్రతిబింబించేలా తగిన వాస్తు శిల్పాలతో ఉండాలని ప్రభుత్వం భావించి 14 చోట్ల ఐకానిక్ బ్రిడ్జిలను నిర్మించాలని నిర్ణయించి వాటికి టెండర్లు సైతం పిలిచింది. పలు చోట్ల నిర్మాణానికి శంకుస్థాపన చేయగా, ప్రాథమికంగా భూమిని చదును చేసే పనులను ఎన్నికల ముందే హెచ్ఎండీఏ చేపట్టింది.