హైదరాబాద్, జూన్ 18(నమస్తే తెలంగాణ): ‘పథకాల్లో కోతలు పెట్టాలె.. లబ్ధిదారుల సంఖ్యను తగ్గించాలె.. తద్వారా ఆర్థిక భారం తగ్గించుకోవాలి..’ ఇది కొద్ది రోజులుగా రాష్ట్ర ప్రభుత్వం చేస్తున్న కసరత్తు. ప్రభుత్వ పథకాల్లో విధించబోయే కోతలకు, షరతులకు లబ్ధిదారులను ముఖ్యంగా రైతులను మానసికంగా సిద్ధం చేసేందుకు ప్రభుత్వం వారిపై ‘లీకు’ల అస్ర్తాన్ని ప్రయోగిస్తున్నది. ఎంపిక చేసుకున్న ప్రసార మాధ్యమాలకు తొలుత కోతలపై లీకులు అందించి, తమ ఆలోచనలకు అనుగుణంగా కథనాలను వండి వార్పిస్తున్నది. ఆ తర్వాత ఈ కోతలు, కథనాలపై ప్రజలు ఏమనుకుంటున్నారో? అంటూ ఆరా తీస్తున్నది. ఇందుకోసం ఏకంగా సీఎంవోలోని కీలకవ్యక్తులే రంగంలోకి దిగడం గమనార్హం. దీనికితోడు ప్రత్యేకంగా సర్వే సంస్థలను కూడా నియమించుకున్నట్టు తెలిసింది. ఈ లీకులు, కోతలపై ప్రజల్లో ఎలాంటి చర్చ జరుగుతుందనే అంశంపై ఫ్లాష్ సర్వేలు చేసి నివేదికలు తెప్పించుకుంటున్నట్టు సమాచారం. ఈ రెండు అంశాలే కాకుండా ఇతర అంశాలపై కూడా లీకులిస్తూ రోజువారీగా ఫ్లాష్ సర్వేలు చేయిస్తూ నివేదికలు తెప్పించుకుంటున్నట్టు తెలిసింది. కోతలపై ముందు లీకులిచ్చి.. ఆ తర్వాత పరిణామాలపై అధికారులు ఆరా తీస్తున్నట్టు సమాచారం.
సర్వేల్లో నెగిటివ్ రిపోర్ట్
రుణమాఫీ, రైతుభరోసా (రైతుబంధు) పథకాల్లో కోతలు పెట్టబోతున్నట్టుగా ప్రభుత్వం లీకులిచ్చింది. ఈ పథకాలకు పీఎం కిసాన్ పథకం నిబంధనలు అమలు చేస్తే ఎలా ఉంటుందనే అంశాన్ని లీకుల ద్వారానే తెరపైకి తీసుకొచ్చింది. ఒకవేళ పీఎం కిసాన్ పథకం నిబంధనలు అమలు చేస్తే రాష్ట్రంలోని సగం మంది రైతులు ఇటు రుణమాఫీ, అటు రైతుబంధుకు అనర్హులుగా మిగిలిపోతారు. ఇంత పెద్ద అంశాన్ని లీకుల ద్వారా ప్రజల్లోకి తీసుకెళ్లాలని భావించింది. ఆ తర్వాత ప్రజల నుంచి ఏ రకమైన స్పందన వస్తుందనే అంశంపై ఆరా తీస్తున్నది. ‘రుణమాఫీ, రైతుబంధుకు పీఎం కిసాన్ పథకం నిబంధనలు అమలుచేయాలనే వార్తలపై రైతులు ఏ విధంగా స్పందిస్తున్నారు?’ అంటూ సీఎంవో నుంచి ఆరా తీస్తున్నారు. ఇందులో భాగంగానే తెలిసినవారికి ఫోన్లు చేసి వివరాలు తెలుసుకుంటున్నారు. ఈ క్రమంలో ప్రభుత్వానికి నెగిటివ్ రిపోర్టులు అందినట్టు తెలిసింది. ఈ నిబంధనల అమలుపై రైతుల్లో తీవ్ర వ్యతిరేకత వ్యక్తమవుతున్నట్టు సర్వేల్లో తేలిందని సమాచారం. ఈ నేపథ్యంలో రైతుల నుంచి వస్తున్న వ్యతిరేకతపై ప్రభుత్వంలో ఒకింత ఆందోళన వ్యక్తమవుతున్నట్టు సమాచారం. ప్రచార సమయంలోనే ఇంత భారీ వ్యతిరేకత వ్యక్తమైతే, ఒకవేళ ఈ నిబంధనలను అమలు చేస్తే ఆ వ్యతిరేకత మరింత ఎక్కువవుతుందనే ఆందోళనలో ఉన్నట్టు తెలిసింది. రైతుబంధు, రుణమాఫీ పథకాలకు షరతులు పెట్టి, కోతలు విధిస్తే కాంగ్రెస్ పార్టీ పుట్టి మునగడం ఖాయమని, ఇక తమకు ఆ పార్టీలో రాజకీయ భవిష్యత్తు ఉండదని పలువురు నేతలు కూడా ఆందోళన చెందుతుండటం గమనార్హం.