దామరచర్ల, మే 26: నల్లగొండ జిల్లా దామరచర్ల మండలం విష్ణుపురం రైల్వే స్టేషన్ వద్ద గూడ్స్ రైలు ఆదివారం పట్టాలు తప్పింది. సికింద్రాబాద్ నుంచి గుంటూరు వైపు వెళ్తున్న ఖాళీ గూడ్స్ రైలు.. మధ్యాహ్నం 2:45 నిమిషాలకు విష్ణుపురం రైల్వేస్టేషన్ దాటగానే అకస్మాత్తుగా కుదుపునకు గురై ముందు భాగంలోని 6, 7 బోగీలు పట్టాలు తప్పి వంగిపోయాయి. గమనించిన లోకోపైలెట్ రైలును నిలిపివేసి స్టేషన్కు సమాచారం అందజేశారు. ఆంధ్రా, తెలంగాణ సరిహద్దు స్టేషన్ కావడంతో పరిసర స్టేషన్ల నుంచి రైల్వే అధికారులు, సిబ్బంది విష్ణుపురం స్టేషన్కు చేరుకొని పరిస్థితిని సమీక్షించారు. గూడ్స్రైలు మెయిన్ ట్రాక్పై పట్టాలు తప్పడంతో సికింద్రాబాద్ నుంచి గుంటూరు వైపు వెళ్లే ఇతర ప్యాసింజర్, ఎక్స్ప్రెస్ రైళ్ల రాకపోకలను నిలిపివేశారు. గుంటూరు నుంచి ఏఆర్టీ ప్రత్యేక వాహనాన్ని తీసుకొచ్చి పట్టాలు తప్పిన రెండు గూడ్స్ బోగీలను సరిచేసి గూడ్స్ను తొలగించి రైళ్ల రాకపోకలను పునరుద్ధ్దరించారు. కాగా.. గూడ్స్రైలు పట్టాలు తప్పడంతో అధికారులు అప్రమత్తమై మిర్యాలగూడ స్టేషన్లో శబరి, సికింద్రాబాద్ స్టేషన్లో పల్నాడు, రేపల్లె-నడికుడి స్టేషన్లో జన్మభూమి, గుంటూరు స్టేషన్లో నాగర్సోల్ రైళ్లను నిలిపివేశారు. సుమారు 6 గంటలపాటు రైళ్లను నిలిపివేయడంతో ప్రయాణికులు ఇబ్బందులు పడ్డారు.