నమస్తే తెలంగాణ నెట్వర్క్, జూలై 21: భద్రాద్రి జిల్లా భద్రాచలం వద్ద గోదావరి ఉధృతంగా ప్రవహిస్తున్నది. భద్రాచలం వద్ద దాదాపు 9 లక్షల క్యూసెక్కుల వరద కొనసాగుతున్నది. ఆదివారం రాత్రి 8 గంటలకు నీటిమట్టం 43.6 అడుగులకు చేరింది. దీంతో అధికారులు మొదటి ప్రమాద హెచ్చరికను జారీ చేశారు. ఎగువన ఉన్న మహరాష్ట్ర, ఛత్తీస్గఢ్ రాష్ర్టాల్లో కురుస్తున్న వర్షాల వల్ల గోదావరికి వరద పెరుగుతున్నది. ఆదివారం సాయంత్రానికి 41.9 అడుగులుగా ఉన్న వరద రాత్రి 8 గంటలకు 43.6 అడుగులకు పెరిగింది. స్నానఘట్టాలు మునిగిపోయి కల్యాణకట్ట వద్దకు వరద చేరుకున్నది. రామయ్య దర్శనానికి వచ్చిన భక్తులు మెట్ల వద్దకు వచ్చి శిరస్సున గోదావరి నీళ్లు చల్లుకొని వెళ్తున్నారు. 43 అడుగులు దాటడంతో మొదటి ప్రమాద హెచ్చరిక జారీ అయింది. విస్తా కాంప్లెక్స్ వద్ద ఉన్న పంప్హౌస్ నుంచి పట్టణంలోని వర్షపునీటిని గోదావరిలోకి వదులుతున్నారు. భద్రాచలంలో 5 రోజులుగా వర్షం కురుస్తున్నది.
వరద ప్రభావిత గ్రామాల జాబితా..
భద్రాచలం వద్ద గోదావరి ప్రవాహం ఉధృతంగా ప్రవహిస్తున్నది. ఆదివారం సాయంత్రానికి 43.88 మీటర్ల మేర పారుతున్నది. అధికారులు మొదటి ప్రమాద హెచ్చరికను జారీ చేశారు. గోదావరిలో వరద పెరుగుతూనే ఉన్నది. తాజాగా ఇరిగేషన్ అధికారులు భద్రాచలం డివిజన్లో గోదావరి వరద ప్రభావిత గ్రామాలకు సంబంధించి ముందస్తుగా జాబితాను విడుదల చేశారు. చర్ల, దుమ్ముగూడెం, భద్రాచలం, బూర్గుంపాడు, అశ్వాపురం, మణుగూరు, పినపాక మండలాల పరిధిలో మొత్తంగా 110 గ్రామాల పేర్లను ప్రకటించారు. గోదావరి 43-48 మీటర్ల వద్ద ప్రవహిస్తే ఆయా మండలాల్లో ఎలాంటి ముంపు ఉండబోదని తెలిపారు. 48-53 మీటర్ల వద్ద చర్ల, దుమ్ముగూడెం మండలాల్లో వరద ముంపు ఉండగా, 53-73 మీటర్ల వరకు అన్ని మండలాల్లో ముంపు ఉంటుందని ఇరిగేషన్శాఖ వెల్లడించింది.
కాళేశ్వరం ఫుష్కరఘాట్ వద్ద ఉధృతంగా..
జయశంకర్ భూపాలపల్లి జిల్లా మహదేవపూర్ మండలం కాళేశ్వరం ఫుష్కరఘాట్ వద్ద గోదావరి ఉధృతంగా ప్రవహిస్తున్నది. 9.20 మీటర్ల ఎత్తులో 5.53 లక్షల క్యూసెక్కులుగా లక్ష్మీ బరాజ్ వైపు పారుతున్నది. ములుగు జిల్లా ఏటూరునాగారం మండలం రామన్నగూడెం పుష్కరఘాట్ వద్ద గోదావరి ప్రవాహం ఆదివారం సాయంత్రం ఐదు గంటల వరకు 14.400 మీటర్లకు చేరుకున్నది. మొదటి ప్రమాద హెచ్చరికను 14.830 మీటర్లకు జారీ చేస్తారు. ప్రస్తుతం గోదావరి వరద పెరుగుతుండటంతో ప్రజలను అధికారులు అప్రమత్తం చేస్తున్నారు.
మంగపేట పుష్కరఘాట్, కమలాపురం బిల్ట్ ఇన్టేక్వెల్ వద్ద గోదావరి ప్రవాహం పెరిగింది. వాజేడు మండలంలోని పేరూరు వద్ద ఆదివారం సాయంత్రం ఐదుగంటలకు 15.830 మీటర్లకు (49 అడుగులు) నీటిమట్టం చేరుకున్నది. మహారాష్ట్రతోపాటు ఆదిలాబాద్ జిల్లాలో విస్తారంగా కురుస్తున్న వర్షాలతో ప్రాణహిత నది ఉప్పొంగుతున్నది. ఇంద్రావతి నుంచి సైతం భారీగా వరద వస్తుండటంతో లోయర్ గోదావరి ఉధృతంగా ప్రవహిస్తున్నది. సిర్పూర్(టీ) మండలంలోని సిర్పూర్(టీ)-వెంకట్రావ్పేట్ అంతర్రాష్ట్ర వంతెన వద్ద పెన్గంగ నది ఉధృతంగా ప్రవహిస్తున్నది.