హైదరాబాద్, ఏప్రిల్ 4 (నమస్తే తెలంగాణ) : దేశవ్యాప్తంగా నూతన మెడికల్ కాలేజీల ఏర్పాటు, సీట్ల పెంపునకు సంబంధించిన దరఖాస్తుల పరిశీలన ప్రక్రియను నేషనల్ మెడికల్ కమిషన్ (ఎన్ఎంసీ) ప్రారంభించింది. దేశవ్యాప్తంగా ఈ ఏడాది 170 కాలేజీల నుంచి దరఖాస్తులు వచ్చినట్టు తెలిపింది. ఇందులో 112 నూతన మెడికల్ కాలేజీలు కాగా.. 58 కాలేజీల్లో సీట్ల పెంపునకు దరఖాస్తులు వచ్చినట్టు చెప్పింది. ఇందులో తెలంగాణ నుంచి 10 కొత్త కాలేజీల దరఖాస్తులు ఉన్నాయి. వీటిల్లో 8 ప్రభుత్వ మెడికల్ కాలేజీలు కాగా, రెండు ప్రైవేట్వి. జోగులాంబ గద్వాల, నారాయణ పేట, ములుగు, వరంగల్, మెదక్, యాదాద్రి భువనగిరి, రంగారెడ్డి, మేడ్చల్ మలాజిగిరిలో ప్రభుత్వ మెడికల్ కాలేజీలు ఏర్పాటు కానున్నాయి. జిల్లాకో మెడికల్ కాలేజీలో భాగంగా కేసీఆర్ ప్రభుత్వం తొలిదశలో నాలుగు, రెండో దశలో ఎనిమిది, మూడో దశలో 9 మెడికల్ కాలేజీలను ప్రారంభించింది. గతేడాది మరో 8 మెడికల్ కాలేజీల ఏర్పాటుకు అనుమతులు మంజూరు చేసింది. వీటికే ప్రస్తుతం తనిఖీలు నిర్వహించి అనుమతులు మంజూరు చేయాల్సి ఉన్నది.
అయితే.. కొత్త మెడికల్ కాలేజీలకు అనుమతులు సాధించడంపై ప్రభుత్వం పెద్దగా శ్రద్ధ చూపించడం లేదనే విమర్శలు ఉన్నాయి. ఆరోగ్య శాఖ మంత్రి, హెల్త్ సెక్రటరీ కొత్తవారు రావడం, డీఎంఈని తరుచూ మార్చడం వంటి పరిణామాలతో పనులు మందగించాయి. కాలేజీల అనుమతుల్లో కీలకమైన వైద్యసిబ్బంది నియామకం కూడా జరగలేదంటే పరిస్థితి అర్థం చేసుకోవచ్చు. కాంట్రాక్ట్, ఔట్ సోర్సింగ్ పద్ధతిలో సిబ్బంది నియామకానికి ఇటీవలే ఆర్థిక శాఖ అనుమతి ఇచ్చింది. ఎన్నికల కమిషన్ నుంచి అనుమతి తీసుకొని గత వారం జిల్లాల వారీగా నోటిఫికేషన్ విడుదల చేశారు. ఈ ప్రక్రియ పూర్తయితేనే కాలేజీల అనుమతుల ప్రక్రియ సులభతరం అవుతుంది. సాధారంగా ఎన్ఎంసీ తనిఖీలను మార్చిలో ప్రారంభిస్తుంది. అయితే ఈ ఏడాది కోర్టు కేసు కారణంగా ఆలస్యమైనా.. ఇది రాష్ట్ర ప్రభుత్వానికి కలిసి వచ్చే అవకాశం ఉన్నది.