హైదరాబాద్, జూలై 6 (నమస్తే తెలంగాణ): సాధారణ బదిలీల్లో ఉద్యోగ సంఘాల నేతలు బదిలీల నుంచి మినహాయింపు కోసం తీవ్ర ప్రయత్నాలు చేస్తున్నారు. గుర్తింపు పొందిన సంఘాల ఆఫీసర్ బేరర్ లెటర్ల కోసం సంఘాల నేతల చుట్టూ ప్రదక్షిణ చేస్తున్నారు. రాష్ట్ర ప్రభుత్వం నుంచి గుర్తింపు పొందిన సర్వీస్ అసొసియేషన్ల ఆఫీస్ బేరర్లు బదిలీల మినహాయింపు పొందవచ్చు. టీఎన్జీవో, టీజీవో, డ్రైవర్స్ అసొసియేషన్, నాలుగో తరగతి ఉద్యోగుల సంఘం, డాక్టర్స్ అసొసియేషన్, అగ్రికల్చర్ ఆఫీసర్స్, కమర్షియల్ ట్యాక్స్, అటవీశాఖల్లోని ఉద్యోగ సంఘాలు సహా మరికొన్ని సంఘాలకు ప్రభుత్వ గుర్తింపు ఉంది. వీటికి చెందిన స్టేట్, జిల్లా, డివిజినల్, తాలుకా సంఘాల ఆఫీసు బేరర్లు మొత్తంగా రెండు పర్యాయాలు మినహాయింపును వాడుకోవచ్చు.
ఒకరు గరిష్ఠంగా 6 ఏండ్ల పాటు మినహాయింపు పొందవచ్చు. దీనిని ఆసరాగా చేసుకుని కొంత మంది అనర్హులు కీలకస్థానాల్లో తిష్టవేసేందుకు యత్నిస్తున్నారన్న ఆరోపణలు వినిపిస్తున్నాయి. దీనిపై ఉద్యోగ సంఘాల నేతలు అప్రమత్తమయ్యారు. ఇటీవలే ఓ కీలక సంఘం సంఘ బాధ్యులకు కాకుండా ఇతరులకు లెటర్లు జారీచేస్తే క్రిమినల్కేసులు పెడతామని తమ సంఘ సభ్యులను హెచ్చరించింది. తాము కేంద్ర సంఘం స్థాయిలోను లేఖలిస్తామని, జిల్లా స్థాయిలో ఆఫీసర్ బేరర్లకు లేఖలు ఇవ్వరాదని మరో సంఘం తమ జిల్లా శాఖలకు ఖరాఖండిగా చెప్పేసింది.