కరీంనగర్ కార్పొరేషన్/ కొత్తపల్లి, నవంబర్ 14 : ‘ఆంధ్రా నాయకులు ఢిల్లీ పార్టీలతో కుమ్మకై పచ్చగా ఉన్న తెలంగాణను మళ్లీ దోచుకునేందుకు సిద్ధమయ్యారు. జాగ్రత్తగా ఉండాలి’ అని కరీంనగర్ బీఆర్ఎస్ అభ్యర్థి, మంత్రి గంగుల కమలాకర్ సూచించారు. మంగళవారం కరీంనగర్ జిల్లా మలాపూర్, లక్ష్మీపూర్ గ్రామాలతోపాటు పలు డివిజన్లలో ఎన్నికల ప్రచారం నిర్వహించారు. గంగుల మాట్లాడుతూ.. కాంగ్రెస్, బీజేపీకి ఓటేస్తే ఢిల్లీకి వెళ్తాయని చెప్పారు. కరీంనగర్ అసెంబ్లీ నియోజకవర్గంలో తాను చేసిన అభివృద్ధి పనులు, తెలంగాణ ప్రభుత్వ సంక్షేమ పథకాలు తనను నాలుగోసారి విజయం అందించనున్నాయని ధీమా వ్యక్తం చేశారు.