జయశంకర్ భూపాలపల్లి : కేసీఆర్, కేటీఆర్ సహకారంతో భూపాలపల్లి నియోజకవర్గాన్ని అభివృద్ధిలో ముందంజలో నిలిపాను. ప్రభుత్వ అభివృద్ధి సంక్షేమ పథకాలను ముందుకు తీసుకెళ్లడంతో పాటు జీఎంఆర్ ట్రస్టు ద్వారా అనేక సేవలందించాను. ప్రజలు ఊహించని షాక్ ఇచ్చారు. ప్రజా తీర్పును గౌరవిస్తున్నామని భూపాలపల్లి మాజీ ఎమ్మెల్యే గండ్ర వెంకటరమణారెడ్డి (Gandra Venkataramana Reddy) అన్నారు. ఆయన సోమవారం మీడియా సమావేశంలో మాట్లాడారు.
2009లోనే భూపాలపల్లి అభివృద్ధికి బలమైన పునాదులు వేశానని తెలిపారు. 2018లో మళ్లీ గెలిచి అభివృద్ధిని అగ్రభాగంలో నిలిపినట్లు పేర్కొన్నారు. ఓటమిపై లోతుగా అధ్యయనం చేస్తాం. కారణాలను అధిష్ఠానం దృష్టికి తీసుకెళ్తామని స్పష్టం చేశారు. ప్రజలు ప్రతిపక్ష స్థానంలో కూర్చోబెట్టారు. ప్రతిపక్ష పాత్ర కీలకమైంది. ప్రతిపక్షంలో నిర్మాణాత్మక పాత్ర పోషిస్తామని తెలిపారు. అధికారంలోకి వచ్చిన ప్రభుత్వం ప్రజలకు ఇచ్చిన హామీలు అమలు చేయాలని సూచించారు.