హైదరాబాద్, జూలై 18 (నమస్తే తెలంగాణ): రాష్ట్రంలో రుణమాఫీ నేపథ్యంలో రైతులు పండుగ చేసుకుంటున్నట్టుగానే బ్యాంకర్లూ పండుగ చేసుకోవాలని డిప్యూటీ సీఎం మల్లు భట్టి విక్రమార్క అన్నారు. రైతు రుణమాఫీ కింద వచ్చిన నిధులను తిరిగి అదే రైతులకు వెంటనే రుణాలు మంజూరు చేయాలని తెలిపారు.
ఈ నిధులు ఇతర అప్పులకు జమచేసి, రైతులను ఇబ్బందులు పెట్టవద్దు అని ఆదేశించారు. గురువారం ప్రజాభవన్లో ఏర్పాటు చేసిన బ్యాంకర్ల సమావేశంలో డిప్యూటీ సీఎం మల్లు భట్టి విక్రమార్క, వ్యవసాయ శాఖ మంత్రి తుమ్మల నాగేశ్వర్రావు పాల్గొన్నారు. ఈ సందర్భంగా డిప్యూటీ సీఎం మాట్లాడుతూ.. రాష్ట్రంలో ఆగస్టు నెలాఖరువరకు రైతు రుణమాఫీకి రూ.31వేల కోట్లు విడుదల చేస్తామని తెలిపారు. గురువారం సాయంత్రం 4గంటల వరకు 11లక్షలకుపైగా రైతులకు రూ.6000 కోట్ల వరకు నిధులు విడుదలైనట్టు చెప్పారు.
ఈ నెలలోనే రెండో దఫాలో లక్షన్నర వరకు రుణమాఫీకి నిధులు విడుదల చేస్తామని పేర్కొన్నారు. మొత్తం 40 లక్షల బ్యాంకు ఖాతాల ద్వారా రూ.31వేల కోట్లు రుణమాఫీకి ప్రభుత్వం జమ చేస్తుందని చెప్పారు. వ్యవసాయ శాఖ మంత్రి తుమ్మల నాగేశ్వరరావు మాట్లాడుతూ.. బ్యాంకుల వద్ద తొక్కిసలాట జరుగకుండా గ్రామాల వారీగా తేదీలు ఇచ్చి రుణమాఫీని సజావుగా జరిగేలా చూడాలని బ్యాంకర్లకు తెలిపారు. రైతు రుణమాఫీ నిధులు సకాలంలో అందితే వ్యవసాయం పండుగలా మారుతుందని అభిప్రాయపడ్డారు.