KCR | కరీంనగర్, జనవరి 29 (నమస్తే తెలంగాణ : నారాయణపూర్ రిజర్వాయర్ పరిస్థితిపై బీఆర్ఎస్ అధినేత కే చంద్రశేఖర్రావు ఆరా తీశారు. నమస్తే తెలంగాణ దినపత్రికలో వచ్చిన కథనాన్ని చదివిన కేసీఆర్ కరీంనగర్ జిల్లాలో రైతులు ఎదుర్కొంటున్న సాగునీటి సమస్యపై చలించిపోయారు. సోమవారం మధ్యాహ్నం చొప్పదండి మాజీ ఎమ్మెల్యే సుంకె రవిశంకర్కు ఫోన్చేసి అక్కడి రైతులు ఎదుర్కొంటున్న సాగునీటి సమస్యపై అడిగి తెలుసుకున్నారు. నియోజకవర్గంలోని గంగాధర, కొడిమ్యాల, మల్యాల మండలాల్లో పంటలు ఎండిపోతున్నాయని, తానే స్వయంగా వెళ్లి వాటిని పరిశీలించానని రవిశంకర్ చెప్పారు. అధికారులతో మాట్లాడారా? అన్న కేసీఆర్ ప్రశ్నకు ఎమ్మెల్యే బదులిస్తూ ఇప్పటికిప్పుడు నీళ్లు ఇచ్చే పరిస్థితి లేదని అధికారులు చెబుతున్నారని కేసీఆర్కు తెలిపారు.
చొప్పదండి, వేములవాడ నియోజకవర్గాల్లో ఈ ప్రభావం పడుతున్నదని, 70-80 వేల ఎకరాలు నారాయణపూర్ రిజర్వాయర్పై ఆధారపడి ఉంటాయని రవిశంకర్ వివరించారు. స్పందించిన కేసీఆర్ రైతుల పక్షాన నిలబడి, వారికి నీళ్లు అందేలా చూడాలని సూచించారు. రవిశంకర్ మాట్లాడుతూ.. సార్ మీరు ముఖ్యమంత్రిగా ఉన్నప్పుడు అడగకుండానే అన్నీ ఇచ్చారని, నీళ్లు పుష్కలంగా ఉండేవని, రైతుబంధు సకాలంలో వచ్చేదని, ఎలాంటి బాధలు లేకుండా చూసుకున్నారని రైతులు చెప్పారని పేర్కొన్నారు. కాంగ్రెస్ ప్రభుత్వం అధికారంలోకి వచ్చిన తర్వాత నీళ్లు లేవని, రైతుబంధు రావడం లేదని రైతులు చెప్తూ ఆవేదన వ్యక్తం చేశారని వివరించారు. అధికారులతో మాట్లాడి సకాలంలో నీళ్లు వచ్చేలా చూడాలని రవిశంకర్కు కేసీఆర్ సూచించారు.