హైదరాబాద్, జూలై 9 (నమస్తే తెలంగాణ): రాష్ట్రంలో ఎనిమిది మెడికల్ కళాశాలలకు మెడికల్ కౌన్సిల్ అనుమతులు నిరాకరించడం సీఎం రేవంత్రెడ్డి వైఫల్యమేనని మాజీ ఎమ్మెల్యే పెద్ది సుదర్శన్రెడ్డి విమర్శించారు. మెడికల్ కాలేజీల్లో మౌలిక సదుపాయాలకు నిధులు కేటాయించకపోవడంతోనే ఎన్ఎంసీ అనుమతులు ఇవ్వడంలేదన్నారు.
మంగళవారం తెలంగాణభవన్లో ఆయన మీడియాతో మాట్లాడుతూ కేసీఆర్ హయంలో వైద్య విద్యను ప్రోత్సహించాలని ప్రతి జిల్లాకో మెడికల్ కాలేజీని కేటాయించినట్టు చెప్పారు. ప్రతి వైద్య కళాశాలకు రూ.300 కోట్లు వెచ్చించి మౌలిక వసతులు కల్పించారని గుర్తుచేశారు. 2024-25 సంవత్సరానికి 8 మెడికల్ కాలేజీలు ప్రారంభించాలని బీఆర్ఎస్ ప్రభుత్వం నిర్ణయించిందని తెలిపారు.
దవాఖానలను నిర్మాణం చేసినా.. కాలేజీ అనుమతులపై ప్రస్తుత ప్రభుత్వం దృష్టి పెట్టకపోవడంతోనే సమస్య వచ్చిందని పేర్కొన్నారు. సీఎం రేవంత్రెడ్డి, మంత్రులుగానీ ఢిల్లీలో సరైన విధంగా ఫాలోఅప్ చేయని ఫలితంగానే ఎనిమిది మెడికల్ కళాశాలలకు అనుమతులు రాలేదని ఆరోపించారు. ఇది రాష్ట్రానికి జరిగిన అవమానంగా బీఆర్ఎస్ భావిస్తున్నదని తెలిపారు. రేవంత్కు పార్టీ ఫిరాయింపుల మీద ఉన్న శ్రద్ధ పేద వైద్య విద్యార్థుల భవిష్యత్ మీదలేదని మండిపడ్డారు.సమావేశంలో బీఆర్ఎస్ నేతలు ఎర్రోళ్ల శ్రీనివాస్, వాసుదేవరెడ్డి, లక్ష్మణ్రావు తదితరులు పాల్గొన్నారు.