హైదరాబాద్, జూలై 12 (నమస్తే తెలంగాణ) : బీఆర్ఎస్కు ప్రజలే రక్షకులని, వారి ఆశీర్వాదంతో తిరిగి అధికారంలోకి వస్తామని మాజీ మంత్రి వీ శ్రీనివాస్గౌడ్ ధీమా వ్యక్తంచేశారు. తాగ్యాల పునాదులపై బీఆర్ఎస్ ఏర్పాటైందని, ఎన్నో ఒడిదొడుకులను ఎదుర్కొంటూ వస్తున్నదని చెప్పారు. బీఆర్ఎస్లోంచి కాంగ్రెస్కు వెళ్లి బీఆర్ఎస్ నాయకత్వంపైనే విమర్శలు చేయడం సబబుకాదని, బీఆర్ఎస్కు, కేసీఆర్కు జైకొట్టిన వారే ఇప్పుడు పార్టీయే ఉండదన్నట్టు మాట్లాడుతున్నారని, బీఆర్ఎస్ను లేకుండా చేయడం ఎవరితరం కాదని స్పష్టంచేశారు.
శుక్రవారం తెలంగాణభవన్లో ఆయన మీడియా సమావేశంలో మాట్లాడుతూ స్థానిక ఎన్నికల ఫలితాలు పార్లమెంట్ ఎన్నికల్లా ఉండవని, ప్రజలు వచ్చే ఎన్నికల్లో మంచి నిర్ణయం తీసుకుంటారని అభిప్రాయపడ్డారు. ఇచ్చిన హామీలు నెరవేర్చకుంటే కాంగ్రెస్కు ప్రజలే తగిన బుద్ధి చెబుతారని హెచ్చరించారు. ‘ఎమ్మెల్యేలు ఇష్టం లేకుంటే పోండి.. కానీ తల్లి లాంటి పార్టీని విమర్శించవద్దు’ అని సూచించారు.
బీఆర్ఎస్ను ఉద్యమంలోనే చంపాలని చాలా మంది ప్రయత్నించి విఫలమయ్యారని, ఇపుడు కూడా బీఆర్ఎస్ను లేకుండా చేయాలనే కుట్రలు సఫలం కావని చెప్పారు. బీఆర్ఎస్ లేకుంటే తెలంగాణ వచ్చేదా? అని, కేసీఆర్ ఉద్యమం చేయకుంటే స్వరాష్ట్రం సాకారమయ్యేదా? అని ప్రశ్నించారు. ‘దమ్ముంటే స్థానిక సంస్థల ఎన్నికలు త్వరగా పెట్టండి.. బీఆర్ఎస్ బలాన్ని చూపిస్తాం’ అని స్పష్టంచేశారు.
బీఆర్ఎస్ నుంచి దొంగలే బయటకు వెళ్తున్నారని, నిజమైన కార్యకర్తలు పార్టీలోనే ఉంటున్నారని వికారాబాద్ మాజీ ఎమ్మెల్యే మెతుకు ఆనంద్ చెప్పారు. సమావేశంలో మాజీ ఎమ్మెల్యే పీ శశిధర్రెడ్డి, బీఆర్ఎస్వీ రాష్ట్ర అధ్యక్షుడు గెల్లు శ్రీనివాస్యాదవ్, కార్పొరేషన్ల మాజీ చైర్మన్లు రవీందర్సింగ్, పల్లె రవికుమార్ పాల్గొన్నారు.