హైదరాబాద్, జూన్ 21 (నమస్తే తెలంగాణ) : పోచారం శ్రీనివాస్రెడ్డి లాంటి పెద్ద మనిషి పార్టీ మారడం గర్హనీయమని మాజీ మంత్రి సింగిరెడ్డి నిరంజన్రెడ్డి అన్నారు. 2012లో ఆయన రాజీనామా చేసి తెలంగాణ కోసం పోటీ చేస్తే అందరం కలిసి గెలిపించుకున్నామని గుర్తుచేశారు. 2014లో తెలంగాణ మొదటి వ్యవసాయ శాఖ మంత్రిగా, 2018లో స్పీకర్గా ఆయనకు కేసీఆర్ అవకాశం ఇచ్చారని తెలిపారు. పోచారం అడిగిందే తడవుగా అన్ని పనులను ప్రభుత్వం ఆమోదించిందని, ముఖ్యమంత్రి నియోజకవర్గంలో కూడా కట్టనన్ని ఇండ్లు బాన్సువాడ నియోజకవర్గంలో కట్టేందుకు కేసీఆర్ అనుమతులిచ్చారని పేర్కొన్నారు.
2023 ఎన్నికల్లో ఆయన ఆరోగ్యం బాలేదని, పోటీ చేయనని చెప్పి ఆయనే పోటీ చేశారని, ఇప్పుడు ఏ నైతికతతో పోచారం పార్టీ మారుతున్నారో అర్థం కావడం లేదని, ఇలాంటివారితో తెలంగాణ సమాజం గందరగోళంలో పడుతుందని తెలిపారు. స్పీకర్, వ్యవసాయ మంత్రిగా కేసీఆర్ ఆయనకు ఎంతో గౌరవం ఇచ్చారని, ఆయన కుమారుడికి డీసీసీబీ చైర్మన్గా అవకాశం కల్పించారని గుర్తుచేశారు. లక్ష్మీపుత్రుడు అని ఆయనను బహిరంగ సభలు, అంతర్గత సమావేశాల్లో కేసీఆర్ పొగిడారని, ఇంతచేసినా కఠినంగా, నిర్దాక్షిణ్యంగా పోచారం ఎందుకు వ్యవహరించారో అర్థం కావడం లేదని పేర్కొన్నారు.