హైదరాబాద్, జూన్ 22 (నమస్తే తెలంగాణ): రైతుబంధు డబ్బులు ఎగ్గొట్టేందుకే కాంగ్రెస్ ప్రభుత్వం కుంటిసాకులు చెప్తున్నదని మాజీ మంత్రి నిరంజన్రెడ్డి ఆరోపించారు. క్యాబినెట్ సబ్కమిటీ పేరుతో కాలయాపన చేయాలని, చివరికి రైతుబంధు ఎగ్గొట్టాలని చూస్తున్నారని విమర్శించారు. శనివారం తెలంగాణభవన్లో మీడియాతో మాట్లాడుతూ.. రాష్ట్ర రైతాంగం గొంతు కోయడమే కాంగ్రెస్ ప్రభుత్వం పని అన్నట్టుగా ఉన్నదని, ఎన్నికల ముందు ప్రజలను నమ్మించి మోసం చేశారని ధ్వజమెత్తారు.
రేవంత్ ప్రభుత్వం వచ్చి మూడు సీజన్లు అవుతున్నా, రైతు భరోసా, రైతుబంధు సరిగా ఇవ్వలేదని మండిపడ్డారు. రైతు భరోసాపై మంత్రి వర్గ ఉపసంఘం వేసి జూలై 15 దాకా డెడ్లైన్ పెట్టారని, అప్పటికే నాట్లు వేసే పని పూర్తవుతుందని, సీజన్ అయిపోయాక రైతు భరోసా ఇస్తారా? రైతు భరోసాకు అర్హులెవరో ఇప్పటిదాకా ఎందుకు తేల్చలేదు? అని ప్రశ్నించారు. రాష్ట్రంలో 2,603 వ్యవసాయ క్లస్టర్లు.. ప్రతి క్లస్టర్లో 5 వేల ఎకరాలు ఉంటాయని, ఇందులో ఎన్ని ఎకరాలు, ఏ పంట సాగు చేస్తున్నారనే విషయాలన్నీ ప్రభుత్వం వద్ద ఉన్నాయని చెప్పారు.
వ్యవసాయరంగానికి కేసీఆర్ హయాంలో రూ.4.50 లక్షల కోట్లు వెచ్చించామని వెల్లడించారు. 5 ఎకరాల్లోపు రైతులు 92.50 శాతం ఉన్నారని, 25 ఎకరాలకు పైబడి ఉన్న రైతులు 6,488 మందికి మించి లేరని వివరించారు. ప్రతిపక్షంలో ఉన్నపుడు ఏడాదిలో మూడు పంటలకు రైతుబంధు ఇవ్వాలని రేవంత్రెడ్డి డిమాండ్ చేశారని, ఇప్పుడు రెండు పంటలకు కూడా ఇవ్వడం లేదని విమర్శించారు. కాంగ్రెస్ ప్రభుత్వం రైతాంగం ఉసురుపోసుకుంటున్నా మేధావులు నోరెత్తడంలేదని మండిపడ్డారు.
బీఆర్ఎస్లోనే కొనసాగుతా: ఎర్రబెల్లి
తాను బీఆర్ఎస్లోనే కొనసాగుతానని మాజీ మంత్రి ఎర్రబెల్లి దయాకర్రావు స్పష్టం చేశారు. మరోసారి కేసీఆర్ను సీఎం చేయటమే తన లక్ష్యమని స్పష్టంచేశారు. పార్టీ మారుతున్నానని దుష్ప్రచారం చేస్తున్నారని తెలిపారు. సమావేశంలో మాజీ ఎమ్మెల్యే ఆనంద్, మాజీ ఎమ్మెల్సీ శ్రీనివాస్రెడ్డి పాల్గొన్నారు.