హైదరాబాద్, మార్చి1 (నమస్తే తెలంగాణ): కాళేశ్వరం ప్రాజెక్టు ప్రజలకు అద్భుత ఫలితాలను ఇస్తుందని, మరమ్మతులు చేస్తే రైతులకు మరిన్ని ఫలితాలు చేకూరుతాయని, ఆ దిశగా రాష్ట్రప్రభుత్వం వెంటనే చర్యలు చేపట్టాలని బీఆర్ఎస్ ఎమ్మెల్యే, మాజీ మంత్రి కడియం శ్రీహరి డిమాండ్ చేశారు. బీఆర్ఎస్ ‘చలో మేడిగడ్డ’ యాత్రలో భాగంగా అన్నారం బరాజ్ వద్ద ‘కాళేశ్వరంపై కాంగ్రెస్ విషప్రచారం.. బీఆర్ఎస్ వాస్తవాలు’ పేరిట పవర్పాయింట్ ప్రజెంటేషన్ను ఇచ్చారు. కాళేశ్వరం ప్రాజెక్టుపై కాంగ్రెస్ ప్రభుత్వం చేస్తున్న ప్రచారాన్ని దీటుగా తిప్పికొట్టారు. కాంగ్రెస్ లేవనెత్తిన ప్రతి అంశానికి సోదాహరణంగా వివరణ ఇచ్చారు. ప్రాణహిత-చేవెళ్ల ప్రాజెక్టు రీడిజైనింగ్ ఆవశ్యకత, కాళేశ్వరం ప్రాజెక్టు సమగ్ర స్వరూపాన్ని అంశాల వారీగా విశదీకరించారు. ప్రాజెక్టు అంచనా వ్యయం ఎందుకు పెరిగింది? ఎలా పెరిగింది? రిజర్వాయర్ల సామర్థ్యం ఎందుకు పెంచాల్సి వచ్చింది.. అన్న అంశాలను సోదాహరణంగా తెలిపారు. కాళేశ్వరం ప్రాజెక్టు ద్వారా సాధించిన విజయాలను, సాగు నీరందిన ఆయకట్టు తదితర గణాంకాలను వెల్లడించారు. కాళేశ్వరంతో 20 లక్షల 33 వేల 572 ఎకరాలకు సాగునీరు అందిందని, ఆయకట్టు స్థిరీకరణ సాధ్యమైందని కడియం శ్రీహరి తెలిపారు. అంచనా వ్యయం పెరిగిందని కాంగ్రెస్ చేస్తున్న ప్రచారం పూర్తిగా అర్థరహితమని తెలిపారు. కాంగ్రెస్ ప్రభుత్వ నిర్లక్ష్యంతో రైతులకు సాగునీటి కష్టాలు వచ్చాయని, ఇలాగే ఉంటే ఇంకో నెలలో పరిస్థితి మరింత దారుణంగా మారుతుందని హెచ్చరించారు.
గత ఐదేండ్లలో వరుసగా సాగునీరిచ్చిన బీఆర్ఎస్ సర్కారు
ఈసారి వానలు లేవని కాంగ్రెస్ వారు అంటున్నారని, గత ఐదేండ్లలో ఎప్పుడూ ఇబ్బంది లేకుండా బీఆర్ఎస్ ప్రభుత్వం సాగునీరు ఇచ్చిందని కడియం శ్రీహరి తేల్చి చెప్పారు. మేడిగడ్డపై కాంగ్రెస్ పార్టీ దివాళాకోరు రాజకీయం చేస్తున్నదని, రాజకీయంగా కాంగ్రెస్ను ఎలా ఎదుర్కోవాలో బీఆర్ఎస్కు, కేసీఆర్కు బాగా తెలుసని చెప్పారు. మేడిగడ్డ బరాజ్ను వెంటనే పునరుద్ధరించాలని, వానకాలంలో వచ్చే వరదలకు మేడిగడ్డ బరాజ్కు ఏదైనా అయితే రాష్ట్ర ప్రభుత్వానిదే బాధ్యతని స్పష్టం చేశారు. మేడిగడ్డ బరాజ్పై ఎలాంటి విచారణకైనా బీఆర్ఎస్ సిద్ధమేనని, బాధ్యులపై ఎలాంటి చర్యలైనా తీసుకోవచ్చని తెలిపారు. కాళేశ్వరం ప్రాజెక్టులో ఒక భాగమైన మేడిగడ్డ బరాజ్లో కొన్ని పిల్లర్లు కుంగిపోయాయని, దీంతో గత ప్రభుత్వంపై రాజకీయ దాడి చేయాలని కాంగ్రెస్ చూస్తున్నదని, అసలు ఆ నిర్మాణమే పనికి రాదన్నట్టు కాంగ్రెస్ వ్యవహరిస్తున్నదని కడియం ధ్వజమెత్తారు. కేసీఆర్ ఆదేశాల మేరకే తాము ప్రాజెక్టును సందర్శించామని, వాస్తవాలను ప్రజలకు చెప్పాలన్న ఆయన ఆలోచనతోనే మేడిగడ్డకు తరలివచ్చామని చెప్పారు. బీఆర్ఎస్ మేడిగడ్డ యాత్రకు పోటీగా కావాలనే కాంగ్రెస్ నేతలు పాలమూరు పర్యటన పెట్టుకున్నారని, తాము వాస్తవాలు చెప్పడానికి వస్తున్న తరుణంలోనే వారు రాజకీయ యాత్రలు ఎందుకు చేస్తున్నారని ప్రశ్నించారు.