హైదరాబాద్, జూన్ 18 (నమస్తే తెలంగాణ): ఛత్తీస్గఢ్ నుంచి విద్యుత్తు కొనుగోలుకు సంబంధించి రూ. 7 వేల కోట్లు చెల్లిస్తే రూ. 6 వేల కోట్ల నష్టం ఎలా జరుగుతుందని బీఆర్ఎస్ నేత, మాజీ మంత్రి జగదీశ్రెడ్డి ప్రశ్నించారు. ఛత్తీస్గఢ్తో విద్యుత్తు ఒప్పందంపై కొందరు రాసిన వార్తల్లోని ప్రతి అక్షరం అబద్ధమేనని పేర్కొన్నారు.
కేసీఆర్పై బురదజల్లాలన్న కుట్రలో భాగంగానే ఇలాంటి వార్తలు రాస్తున్నారని మండిపడ్డారు. ఛత్తీస్గఢ్ విద్యుత్తుతో ఎలాంటి నష్టం జరగలేదని ఆధారాలతో సహా నిరూపిస్తామని తెలిపారు. మంగళవారం తెలంగాణ భవన్లో మాజీ ఎమ్మెల్యేలు గ్యాదరి కిశోర్, చిరుమర్తి లింగయ్యతో కలిసి జగదీశ్రెడ్డి మీడియా సమావేశంలో మాట్లాడారు.
గత ప్రభుత్వంపై నిందలు వేయడంతోపాటు కేసీఆర్పై బురద చల్లాలన్న స్వార్థ రాజకీయాలతోనే విచారణ కమిషన్లు ఏర్పాటు చేశారని ఆరోపించారు. విద్యుత్తు కొనుగోలు, ఉత్పత్తి, ట్రాన్సిమిషన్ తదితర అంశాల్లో ఎకడా చిన్న తప్పు కూడా జరగలేదని, ఒక్క రూపాయి కూడా నష్టం జరగలేదని ఆ పార్టీ నేతలకు కూడా అర్థమైందని పేర్కొన్నారు.
నిబంధనలకు విరుద్ధంగా కమిషన్తో మీడియా సమావేశం ఏర్పాటు చేయించి గతంలో కాంగ్రెస్, బీజేపీ నేతలు మాట్లాడిన మాటలనే వారితో చెప్పించారని ఆరోపించారు. కేసీఆర్ తన లేఖలో అన్ని అంశాలను స్పష్టంగా వివరించారని తెలిపారు. జ్యుడీషియల్ కమిషన్, విచారణ అధికారికి ఎలాంటి ముందస్తు అభిప్రాయాలు, వివక్ష ఉండకూడదని పేర్కొన్నారు. జస్టిస్ నరసింహారెడ్డి విచారణకు అంగీకరించి ఉండాల్సింది కాదని అభిప్రాయపడ్డారు.
మీడియా ముందుకు రావడం లేదెందుకు?
రాష్ట్రంలో కేసీఆర్ ఆనవాళ్లు లేకుండా చేయాలంటే తెలంగాణ లేకుండా చేయాలని జగదీశ్రెడ్డి పేర్కొన్నారు. కేసీఆర్కు మసిపూయాలన్న చిల్లర ప్రయత్నం చేస్తున్నారని ఆగ్రహం వ్యక్తంచేశారు. సీఎం, మంత్రులకు దమ్ముంటే మీడియా ముందుకు రావాలని సవాలు విసిరారు. చీకట్లో ముసుగులు వేసుకుని దొంగల్లా వ్యవహరించకుండా విద్యుత్తు కొనుగోళ్లపై సమావేశం పెట్టి చెప్పాలని కోరారు.రూ. 6 వేల కోట్ల నష్టం అన్న దాంట్లో ప్రతి అక్షరం తప్పేనని తేల్చి చెప్పారు.
నల్లగొండలో కడితే ఆంధ్రాలో కట్టినట్టా?
నల్లగొండ జిల్లాలో విద్యుత్తు కేంద్రం ఎందుకు పెట్టారన్న ప్రశ్నపై జగదీశ్రెడ్డి తీవ్ర ఆగ్రహం వ్యక్తంచేశారు. నల్లగొండ జిల్లా తెలంగాణలో లేదా? అని నిలదీశారు. కోదండరామ్కు నల్లగొండ కనిపించడం లేదా? అని మండిపడ్డారు. నల్లగొండలో ప్రాజెక్టు కడితే రాయలసీమ, ఆంధ్రలో కట్టినట్టా? అని ప్రశ్నించారు. నల్లగొండపై విషం కక్కుతున్నా ఆ జిల్లా దద్దమ్మ నేతలు అప్పట్లానే ఇప్పుడు కూడా నోరెత్తడం లేదని ఆగ్రహం వ్యక్తంచేశారు.
తెలంగాణ ఉద్యమంలో నల్లగొండ జిల్లానే ఎక్కువగా కొట్లాడిందని, అక్కడి వారిపైనే ఎక్కువగా కేసులు అయ్యాయని తెలిపారు. ఛత్తీస్గఢ్ నుంచి యూనిట్ విద్యుత్తును రూ.3.90కి కొనుగోలు చేయకముందే జజ్జర్ ఎన్టీపీసీ నుంచి యూనిట్ విద్యుత్తును రూ. 17, తమిళనాడు నుంచి రూ. 11కు కొనుగోలు చేసినట్టు వివరించారు. సింహాద్రి నుంచి రూ. 4.30, తమిళనాడు నుంచి రూ. 4.90కు పీపీఏ కుదుర్చుకున్నట్టు గుర్తుచేశారు.
బహిరంగ మార్కెట్లో కంటే, పీపీఏల కంటే తక్కువకే ఛత్తీస్గఢ్ విద్యుత్తును సరఫరా చేసిందని పేర్కొన్నారు. కోదండరామ్ డొంకతిరుగుడు మాటలు మాని సూటిగా దీనిపై సమాధానం చెప్పాలని డిమాండ్ చేశారు. కేంద్రమంత్రి బండి సంజయ్ తెలివితక్కువగా మాట్లాడుతున్నారని మండిపడ్డారు. కాంగ్రెస్, బీజేపీ వేరు కాదని, రేవంత్-బండి సంజయ్ కలిసి పనిచేస్తున్నారని ఐదేండ్లుగా చెప్తున్నామని, ఇప్పుడు అదే తేలిందని పేర్కొన్నారు.
సూపర్ క్రిటికల్కు ఏడెనిమిదేండ్లు పట్టేది
మణుగూరులో సబ్ క్రిటికల్ యూనిట్ ఏర్పాటుపై నానా రాద్ధాంతం చేస్తున్నారని జగదీశ్రెడ్డి మండిపడ్డారు. ఆ సమయంలో అక్కడ ఆ యూనిట్ ఏర్పాటు చేయకుంటే హైదరాబాద్కు అవసరమైన విద్యుత్తుల్లో 1000 మెగావాట్లు తగ్గేదని, అప్పుడు విద్యుత్తు కోతలతో లక్షల జనరేటర్లు వచ్చి శబ్ద, వాయు కాలుష్యం పెరిగేదని పేర్కొన్నారు. మరి అది కాలుష్యం అవదా? అని ప్రశ్నించారు. ఎక్కడో నాలుగు కిలోల బొగ్గు కాలి పొగ వస్తే.. ఇక్కడ లక్షల మంది ఆరోగ్యాలు కాపాడలేదా? అని నిలదీశారు.
సూపర్ క్రిటికల్ యూనిట్ నిర్మాణం జరగాలంటే ఏడెనిమిదేండ్లు పట్టేదని, కానీ సబ్ క్రిటికల్ యూనిట్ను రెండుమూడేండ్లలోనే నిర్మించినట్టు తెలిపారు. గతంలో యాదాద్రి విద్యుత్తు కేంద్రాన్ని బంద్ చేయిస్తామన్న మంత్రి కోమటిరెడ్డి వెంకటరెడ్డికి నిజంగా రోషం ఉంటే ప్రారంభోత్సవానికి వెళ్లొద్దని సవాలు విసిరారు. కోదండరామ్ చిన్న పదవి కోసం ఆశ పడి దొంగలకు మద్దతు పలుకుతున్నారని, ఎమ్మెల్సీ పదవి కోసం పాకులాడుతున్నారని జగదీశ్రెడ్డి ఎద్దేవా చేశారు.
రూ. 6 వేల కోట్ల నష్టం కాదు.. అంతకుమించి లాభం
ఛత్తీస్గఢ్తో విద్యుత్తు ఒప్పందంతో కాంగ్రెస్ నేతలు ఆరోపిస్తున్నట్టు రూ. 6 వేల కోట్ల నష్టం జరగలేదని, అంతకుమించి లాభం జరిగిందని జగదీశ్రెడ్డి పేర్కొన్నారు.ఛత్తీస్గఢ్ నుంచి యూనిట్ విద్యుత్తును రూ.3.90 కొనుగోలు చేసినట్టు చెప్పారు. చత్తీస్గఢ్తో ఒప్పందం చేసుకోకుంటే కొనుగోలు చేసిన 17 వేల మిలియన్ యూనిట్లకు రూ. 17 వేల కోట్లు కట్టాల్సి వచ్చేదని తెలిపారు. ఛత్తీస్గఢ్ విద్యుత్తుతో రాష్ర్టానికి మేలు జరిగిందని ఆధారాలతో సహా నిరూపించేందుకు తాము సిద్ధంగా ఉన్నట్టు పేర్కొన్నారు.