హైదరాబాద్, మే 25 (నమస్తే తెలంగాణ): తెలంగాణ రాష్ట్రం ఏర్పడి పదేండ్లు పూర్తవుతున్నందున వైద్య విద్య ప్రవేశాల్లో స్థానికత అంశంపై సర్కారు స్పష్టత ఇవ్వాలని మాజీ వైద్యారోగ్యశాఖ మంత్రి, ఎమ్మెల్యే టీ హరీశ్రావు డిమాండ్ చేశారు. మెడికల్ కాలేజీల్లో కన్వీనర్ కోటా సీట్లు వందశాతం తెలంగాణ విద్యార్థులకే దకేలా రాష్ట్ర ప్రభుత్వం చర్యలు తీసుకోవాలని సూచించారు.
జూన్ మూడో వారంలో అడ్మిషన్ల ప్రక్రియ మొదలవుతున్నందున ప్రభుత్వం తక్షణం స్పందించి స్పష్టత ఇచ్చేలా ఉత్తర్వులు జారీ చేయాలని చెప్పారు. లేనిపక్షంలో వైద్య విద్య చదివే అవకాశాలను రాష్ట్ర విద్యార్థులు తీవ్రంగా కోల్పోతారని ఆందోళన వ్యక్తం చేశారు.
శనివారం ఎక్స్ వేదికగా హరీశ్రావు స్పందిస్తూ.. తెలంగాణ ఏర్పాటుకు ముందున్న 20 మెడికల్ కాలేజీల్లోని 2,850 సీట్లలో కాంపిటెంట్ అథారిటీ కోటా కింద 1,900 సీట్లు ఉన్నాయని, ఇందులో 15 శాతం అన్రిజర్వుడు కోటా అంటే 280 సీట్లు తెలంగాణ విద్యార్థులు నష్టపోతారని, నిమ్స్ సహా ఇతర మెడికల్ కాలేజీల్లోని దాదాపు 150 పీజీ సీట్లు కోల్పోతారని తెలిపారు.
ఎంబీబీఎస్, పీజీ అడ్మిషన్ల ప్రక్రియ సమీపిస్తున్నప్పటికీ కాంగ్రెస్ ప్రభుత్వం ఈ ముఖ్యమైన విషయాలను పట్టించుకోకుండా నిర్లక్ష్యం ప్రదర్శిస్తుండటం దురదృష్టకరమని పేర్కొన్నారు. తెలంగాణ విద్యార్థుల ప్రయోజనాలు కాపాడటంలో కాంగ్రెస్ ప్రభుత్వం వైఫల్యం చెందుతున్నదని, రేవంత్ సర్కారు తీరుతో తల్లిదండ్రులు, విద్యార్థులు తీవ్రంగా ఆందోళన చెందుతున్నారని తెలిపారు.
520 సీట్లు కోల్పోయే ప్రమాదం
రాష్ట్ర పునర్విభజన చట్టం మేరకు 2014 నుంచి కన్వీనర్ కోటాలో 15 శాతం సీట్లకు తెలంగాణతోపాటు ఆంధ్రప్రదేశ్ విద్యార్థులు సైతం పోటీపడే వెసులుబాటు కల్పించారని, ఇదే విధానం కొనసాగితే, 2014 తర్వాత ఏర్పాటు చేసిన కొత్త మెడికల్ కాలేజీల్లో కూడా 15 శాతం అన్ రిజర్వుడు కోటా కింద దాదాపు 520 సీట్లు తెలంగాణ విద్యార్థులు కోల్పోవాల్సి వస్తుందని హరీశ్రావు హెచ్చరించారు.
దీన్ని నివారించేందుకు తెలంగాణ ప్రభుత్వం, అన్ రిజర్వుడు కోటాను పాత 20 మెడికల్ కాలేజీలకు మాత్రమే పరిమితం చేసిందని, దీనికోసం, ఏపీ రీఆర్గనైజేషన్ యాక్ట్, ఆర్టికల్ 371డీ నిబంధనలకు లోబడి తెలంగాణ స్టేట్ మెడికల్, డెంటల్ కాలేజెస్ అడ్మిషన్ రూల్స్కు సవరణ చేస్తూ గత బీఆర్ఎస్ ప్రభుత్వం ఉత్తర్వులు జారీ చేసిందని గుర్తుచేశారు. దీని ప్రకారం, 2014 జూన్ 2 తర్వాత ఏర్పాటు చేసిన మెడికల్ కాలేజీల్లోని కాంపిటేటివ్ అథారిటీ కోటాలోని 100 శాతం సీట్లను తెలంగాణ విద్యార్థులకే రిజర్వ్ చేశారని తెలిపారు.
ఈ నిర్ణయం వల్ల తెలంగాణ విద్యార్థులకు 520 మెడికల్ సీట్లు అదనంగా లభించాయని గుర్తుచేశారు. ప్రస్తుతం జూన్ 2తో విభజన చట్టానికి కాలం చెల్లుతుందటంతో పాత మెడికల్ కాలేజీలోని 100 శాతం కన్వీనర్ కోటా సీట్లను కూడా తెలంగాణ విద్యార్థులకు దకేలా చర్యలు తీసుకోవాల్సిన అవసరం ఉన్నదని తెలిపారు.
నాడు 2,850 సీట్లు.. నేడు 8,340 సీట్లు
తెలంగాణ ప్రజలకు సూపర్ స్పెషాలిటీ సేవలు చేరువచేయడంతోపాటు రాష్ట్ర విద్యార్థులకు వైద్య విద్య అందించేందుకు కేసీఆర్ జిల్లాకు ఒక మెడికల్ కాలేజీ ప్రారంభించారని హరీశ్రావు గుర్తుచేశారు. తెలంగాణ ఏర్పాటుకు ముందు ప్రభుత్వ, ప్రైవేటులో కలిపి రాష్ట్రంలో 20 మెడికల్ కాలేజీలు ఉంటే, ఇప్పుడు ఆ సంఖ్య 56కు చేరిందని తెలిపారు. తెలంగాణలో నాడు 2,850 ఎంబీబీఎస్ సీట్లు ఉంటే, ఇప్పుడు 8,340 సీట్లు ఉన్నాయని గుర్తుచేశారు.
ఎంబీబీఎస్, పీజీ సహా ఇతర వైద్య విద్య అభ్యసించాలనుకునే తెలంగాణ బిడ్డలకు పూర్తిస్థాయిలో న్యాయం జరగాలంటే, స్థానికత అంశంపై రేవంత్ సర్కారు స్పష్టత ఇవ్వాలని డిమాండ్ చేశారు. కన్వీనర్ కోటాలోని 100 శాతం సీట్లు తెలంగాణ విద్యార్థులకు దకేలా చూడాలని, ఆ దిశగా రాష్ట్ర ప్రభుత్వం చర్యలు తీసుకొని, డాక్టర్ కావాలనుకొనే వైద్య విద్యార్థుల అవకాశాలు మెరుగుపరచాలని సూచించారు.