పెద్దవంగర, జూలై 24: గత డిసెంబర్ 9న చేయాల్సిన రూ.2 లక్షల రుణమాఫీని ఏడు నెలలు ఆలస్యం చేసి.. రూ.31 వేల కోట్ల మాఫీ అని గొప్పలు చెప్పి.. తీరా రూ.6 వేల కోట్లు విదిల్చి కాంగ్రెస్ ప్రభుత్వం రైతులను మోసం చేసిందని మాజీ మంత్రి ఎర్రబెల్లి దయాకర్రావు విమర్శించారు. బుధవారం మహబూబాబాద్ జిల్లా పెద్దవంగర మండల కేంద్రంలోని బీఆర్ఎస్ పార్టీ కార్యాలయంలో ముఖ్య నాయకుల సమావేశం జరిగింది. ఈ సమావేశంలో పాల్గొన్న ఎర్రబెల్లి మాట్లాడుతూ.. ఎన్నికల్లో కాంగ్రెస్ ఇచ్చిన హామీ మేరకు వానకాలం సీజన్లో ఎకరానికి రూ.7500 చొప్పున రైతు భరోసా కింద ఇవ్వాల్సిన రూ.11,250 కోట్లు ఎగ్గొట్టి.. ఆ డబ్బుల్లోంచి రుణమాఫీ కింద రూ.6,098 కోట్లు విదిల్చి ఏదో ఘనకార్యం చేసినట్టు ప్రచారం చేసుకుంటున్నదని దుయ్యబట్టారు.
కాంగ్రెస్ పరిస్థితి కొండను తవ్వి ఎలుకను పట్టినట్టు ఉందని ఎద్దేవా చేశారు. రైతుల రుణమాఫీపై కాంగ్రెస్ చెప్పిందెంత? రేవంత్రెడ్డి సరార్ ఇస్తున్నదెంత? అని ప్రశ్నించారు. కేసీఆర్ ఏమీ చేయలేదని, అంతా తామే చేస్తున్నామనే భ్రమల నుంచి కాంగ్రెస్ సరారు బయటకు రావాలని సూచించారు. రైతుబంధు, రైతు బీమా, 24 గంటల నాణ్యమైన ఉచిత విద్యుత్తు, ధాన్యం కొనుగోళ్లు, రెండు విడుతల్లో రూ.28 వేల కోట్ల రుణమాఫీ, మిషన్ కాకతీయ వంటి అనేక పథకాలు అమలు చేసి ఐక్యరాజ్యసమితి ప్రపంచ దేశాల ప్రశంసలు పొందారని గుర్తుచేశారు. జూన్లో వేయాల్సిన రైతు భరోసా జూలై వచ్చినా రైతు ఖాతాలో వేయలేదని, కౌలు రైతులకు ఇస్తామన్న రూ.15 వేలు ఇయ్యలేదని, రైతు కూలీలకు రూ.12 వేల హామీ ఇంకా అమలు చేయలేదని విమర్శించారు.