Niranjan Reddy | హైదరాబాద్, జూలై 17 (నమస్తే తెలంగాణ): రుణమాఫీకి పాస్బుక్కే ప్రామాణికమన్న ముఖ్యమంత్రి రైతు భరోసాకి పాస్బుక్కును ఎందుకు ప్రామాణికంగా తీసుకోవడంలేదని మాజీ మంత్రి సింగిరెడ్డి నిరంజన్రెడ్డి ప్రశ్నించారు. రైతు భరోసా నిధులు ఇవ్వడానికి కుంటిసాకులు వెతుకుతున్నారని ఆయన ఆరోపించారు. బుధవారం తెలంగాణ భవన్లో మాజీ మంత్రి జోగు రామన్నతో కలిసి విలేకరులతో మాట్లాడారు. అన్నదాతల మీద ఆంక్షలు, షరతులు లేకుండా రుణమాఫీ చేయాలని ఆయన డిమాండ్ చేశారు. సీఎం చెప్పినట్టుగా రేషన్కార్డు ప్రామాణికం కాదని మార్గదర్శకాల్లో ఎందుకు సవరణ చేయలేదని ప్రశ్నించారు.
పాస్బుక్కు ఆధారంగా రుణం తీసుకున్న ప్రతి రైతుకు రుణమాఫీ చేయాలని డిమాండ్ చేశారు. ఎలాంటి ఆంక్షలు, షరతులు లేకుండా బీఆర్ఎస్ ప్రభుత్వం రూ.29వేల కోట్ల రుణమాఫీ చేసిందని ఆయన గుర్తుచేశారు. రైతుల సంఖ్యను కుదించేందుకే రుణమాఫీ మార్గదర్శకాలు లోపభూయిష్టంగా ఉన్నాయని ఆయన ఆరోపించారు. గురువారం 11లక్షల మంది రైతులకు రుణమాఫీ చేస్తే, మిగిలిన 49లక్షల మంది పరిస్థితి ఏమిటని ప్రశ్నించారు.
రేషన్కార్డు లేని కుటుంబాల పరిస్థితి ఏమిటో చెప్పాలని డిమాండ్ చేశారు. కొద్దిమందికే రుణమాఫీ ఇచ్చి సంబురాలు చేయాలని ప్రభుత్వం భావిస్తున్నదని, రైతు భరోసా ఎగ్గొట్టి రుణమాఫీకి నిధులు మళ్లిస్తున్నారని ఆయన విమర్శించారు. బీఆర్ఎస్ పార్టీ కట్టిన రైతువేదికలే నేడు కాంగ్రెస్ వేడుకలకు పనికివస్తున్నాయని పేర్కొన్నారు. ఆనాడు వ్యతిరేకించిన రైతు వేదికలు, కాళేశ్వరం, సచివాలయాలు నేడు కాంగ్రెస్ పార్టీకి దికయ్యాయని ఎద్దేవా చేశారు.
వ్యవసాయం బలపడితే వేలమందికి ఉపాధి దొరుకుతుందని పదేండ్ల కేసీఆర్ పాలనలో అన్నదాతలకు అండగా నిలిచామని చెప్పారు. రైతుబంధు, రైతుబీమా, సాగునీరు, ఉచిత కరెంటు, పంటల కొనుగోళ్లు చేసి రైతులలో ఆత్మవిశ్వాసం నింపామని స్పష్టం చేశారు. 2014లో 1.31కోట్ల ఎకరాలలో ఉన్న సాగును 2.38కోట్ల ఎకరాలకు పెంచామని చెప్పారు. 68లక్షల మెట్రిక్ టన్నులు ఉన్న ధాన్యం ఉత్పత్తిని దాదాపు 3 కోట్ల టన్నులకు పెంచుకున్నామని తెలిపారు. అప్పు కోసం చేయిచాచని అన్నదాత కోసం పదేండ్లు పనిచేశామని, రైతుల హామీల అమలుకు కాంగ్రెస్ ప్రభుత్వం మీనమేషాలు లెకిస్తున్నదని ఆయన విమర్శించారు.