సూర్యాపేట టౌన్, జూన్ 12 : కాళేశ్వరాన్ని నింపి సాగునీరు అందించకుండా కాంగ్రెస్ ప్రభుత్వం పెద్ద తప్పు చేసిందని మాజీ మంత్రి, సూర్యాపేట ఎమ్మెల్యే జగదీశ్రెడ్డి విమర్శించారు. బుధవారం ఆయన సూర్యాపేటలోని క్యాంపు కార్యాలయంలో మీడియాతో మాట్లాడారు. పాలకులు నాలుగు నెలలుగా సమయం వృథా చేసి.. ఇప్పుడు హడావిడి చేస్తున్నారని దుయ్యబట్టారు.
గత ప్రభుత్వ లోపాలంటూ ఆరోపణలను రాజకీయాల కోసం వాడుకుంటున్నారనే విషయాన్ని ప్రజలు గమనిస్తున్నారని తెలిపారు. అధికారం చేపట్టి ఆరు నెలలైనా కాంగ్రెస్ పార్టీ హామీల అమలు మరిచి గత ప్రభుత్వంపై నిందలు వేస్తూ పబ్బం గడుపుతున్నదని విమర్శించారు. నీళ్లు, విద్యుత్తు విషయంలో కాంగ్రెస్ పూర్తిగా విఫలమైందని, ప్రజలు మంచి నీళ్ల కోసం మళ్లీ రోడ్డెక్కే పరిస్థితి కనిపిస్తున్నదని పేర్కొన్నారు.
పత్తి విత్తనాల బ్లాక్ దందాలో ఓ మంత్రి పాత్ర ఉన్నదని.. ఆధారాలు రాగానే పూర్తి వివరాలు ప్రజలకు వెల్లడిస్తామని తెలిపారు. ప్రభుత్వ చేతగానితనాన్ని ప్రజల్లోకి తీసుకెళ్తామని చెప్పారు. ఎన్ని కమిషన్లు వేసినా అభ్యంతరం లేదని, కమిషన్ల విచారణ కంటే మీడియా లీకులే ఎక్కువయ్యాయని ఆరోపించారు. కమిషన్ల విచారణ పేరుతో రైతు రుణ మాఫీపై దృష్టి మళ్లించేందుకే కాంగ్రెస్ ప్రయత్నం చేస్తున్నదని దుయ్యబట్టారు.