ధరూరు/అయిజ/మహదేవపూర్/కన్నాయిగూడెం/వాజేడు, జూలై 18: జూరాల ప్రాజెక్టుకు ఎగువ నుంచి 2,500 క్యూసెక్కుల ఇన్ఫ్లో వస్తుండగా.. 25,174 క్యూసెక్కుల నీటిని విద్యుత్తు ఉత్పత్తికి వినియోగిస్తున్నారు. గురువారం నెట్టెంపాడుకు 1,500 క్యూసెక్కులు, భీమాలిఫ్ట్-1కు 1,300 క్యూసెక్కులు, ఎడమ కాల్వకు 870 క్యూసెక్కులు, కుడి కాల్వకు 464 క్యూసెక్కులు, సమాంతర కాల్వకు 600 క్యూసెక్కులు, భీమా లిఫ్ట్-2కు 750 క్యూసెక్కులతో మొత్తం 30,013 క్యూసెక్కుల అవుట్ఫ్లో నమోదైంది.
కర్ణాటకలోని ఎగువ ప్రాంతాల్లో కురుస్తున్న భారీ వర్షాలకు తుంగభద్ర డ్యాంకు వరద పోటెత్తుతున్నది. 1,12,468 క్యూసెక్కుల ఇన్ఫ్లో ఉండగా.. 411 క్యూసెక్కుల అవుట్ ఫ్లో నమోదైంది. జయశంకర్ భూపాలపల్లి జిల్లా మహదేవపూర్ మండల పరిధి అంబట్పల్లిలో ఉన్న మేడిగడ్డ(లక్ష్మీ) బరాజ్కు 53,400 క్యూసెక్యుల వరద వచ్చింది.
బరాజ్లోని మొత్తం 85 గేట్లు ఎత్తి అంతే మొత్తంలో వరద నీటిని దిగువకు విడుదల చేస్తున్నారు. ములుగు జిల్లా కన్నాయిగూడెం మండలంలోని తుపాకులగూడెం సమ్మక్క బరాజ్కు 2,52,400 క్యూసెక్కుల వరదనీరు రాగా.. మొత్తం 59 గేట్లకుగానూ 52 గేట్లను ఎత్తి 2,51,817 క్యూసెక్కుల నీటిని దిగువకు పంపిస్తున్నారు.