మంచాల, జూన్ 20: వరి తుకానికి నీళ్లు పారించడానికి వెళ్లిన మహిళా రైతు విద్యుదాఘాతాకానికి బలైంది. ఈ ఘటన రంగారెడ్డి జిల్లా మంచాల గ్రామంలో గురువారం రాత్రి చోటుచేసుకున్నది. బంధువులు తెలిపిన వివరాల ప్రకారం.. గ్రామానికి చెందిన తలారి అరుంధతి (48) తనకున్న నాలుగు ఎకరాల్లో వరితోపాటు ఆకుకూరలు సాగుచేసుకున్నది. ఉదయం నుంచి భార్యాభర్తలు పొలం వద్ద కరెంట్ కోసం గంటల తరబడి ఎదురుచూసి సాయంత్రం ఇంటికి వచ్చారు.
అదే సమయంలో కరెంట్ రావడంతో అరుంధతి మళ్లీ పొలానికి వెళ్లింది. రాత్రి 8 అయినా ఇంటికి రాకపోవడంతో కుటుంబ సభ్యులు ఆందోళనతో వెళ్లి చూడగా మోటర్ పంపు పక్కనే విద్యుత్తు షాక్ గురై విగతజీవిగా పడి ఉన్నది. ఉదయం పూట కరెంట్ సరఫరా సక్రమంగా ఉంటే నిండు ప్రాణం బలయ్యేది కాదంటూ కుటుంబ సభ్యులు విలపించారు.