రాజన్న సిరిసిల్ల, మే 15 (నమస్తే తెలంగాణ): ధాన్యం కొనుగోళ్లలో సర్కా రు అలసత్వంపై రైతులు మండిపడుతున్నారు. గ్రామాల్లోకి వచ్చిన కాంగ్రెస్ ప్రజాప్రతినిధులను ఎక్కడికక్కడ నిలదీస్తున్నారు. లారీలను సమకూర్చడంలో అధికార యంత్రాంగం విఫలమైందని ఆగ్రహం వ్యక్తంచేస్తున్నారు. లోక్సభ ఎన్నికల్లో భాగంగా రాజన్న సిరిసిల్ల జిల్లా చందుర్తి మండలం మల్యాల గ్రామానికి ఇటీవల ప్రచారం కోసం వెళ్లిన ప్రభుత్వ విప్, వేములవాడ ఎమ్మె ల్యే ఆది శ్రీనివాస్ను మహిళా రైతులు అడ్డుకున్నారు.
తీసుకెళ్లిన ధాన్యాన్ని సెంటర్లలో తూకం వేయడం లేదని ఆగ్రహం వ్యక్తం చేశారు. రోజుల తరబడి తూకం వేయకపోవడంతో కేంద్రాల్లోనే ఎండలో ఉండాల్సిన దుస్థితి నెలకొన్నదని ఆవేదన చెందారు. పంటకు సరిగా నీళ్లివ్వని సర్కారు.. ధాన్యాన్ని కూడా కొనడం లేదంటూ ఆది శ్రీనివాస్ దృష్టికి తీసుకెళ్లారు.మహిళలు నిలదీయడంతో సమాధానం చెప్పలేక ఆయన అక్కడి నుంచి జారుకున్నారు. 4 రోజుల క్రితం జరిగిన ఈ ఘటనకు సంబంధించిన వీడియో బుధవారం సోషల్ మీడియాలో వైరల్ అయ్యింది.