తాంసి, జూలై 14: అప్పుల బాధ భరించలేక మనస్తాపంతో రైతు ఆత్మహత్య చేసుకున్నాడు. ఈ ఘటన ఆదివారం ఆదిలాబాద్ జిల్లా తాంసి మండలంలో వెలుగుచూసింది. కుటుంబ సభ్యులు, స్థానికులు తెలిపిన వివరాల ప్రకారం.. ఆదిలాబాద్ రూరల్ మండలం బట్టిసావర్గం గ్రామానికి చెందిన రైతు జక్కుల పెద్ద రాజన్న అలియాస్ పోతన్న(48)కు పదెకరాల వ్యవసాయ భూమి ఉన్నది. పెట్టుబడి కోసం రూ.4 లక్షలు అప్పు చేశాడు. రెండేండ్లుగా దిగుబడులు సక్రమంగా రాకపోవడంతో అప్పులు తీరలేదు. అప్పుల వాళ్లు ఇంటికి వస్తుండటం, ఎలా తీర్చాలో తెలియక మనస్తాపం చెంది శనివారం ఉదయం ఇంటి నుంచి వెళ్లాడు. తాంసి మండలం పొన్నారి శివారులోని తన చేనులో పురుగుల మందుతాగి ఆత్మహత్య చేసుకున్నాడు. ఆదివారం అటువైపు వెళ్లిన వారు తాంసి పోలీసులు, కుటుంబ సభ్యులకు సమాచారం అందించారు. పోతన్నకు భార్య రుక్మిణి, ఇద్దరు పిల్లలు ఉన్నారు.