Paddy Procurement | మల్హర్, జూన్ 9: జయశంకర్ భూపాలపల్లి జిల్లా మల్హర్ మండలం ఎడ్లపల్లిలోని డీసీఎంఎస్ కొనుగోలు కేంద్రం వద్ద రైతులు ఆదివారం ఆందోళనకు దిగారు. కొనుగోలు కేంద్రంలో ధాన్యం సేకరణ సక్రమంగా జరగడం లేదంటూ నిరసన చేపట్టారు. ఈ సందర్భంగా రైతులు మాట్లాడుతూ.. తేమ ఉన్నదని, లారీలు రావడం లేదనే కారణాలతో వడ్లు కొంటలేరని ఆరోపించారు. ఇప్పటికే వర్షాలతో మూడు, నాలుగుసార్లు ధాన్యం తడిసి ముద్దయిందని ఆవేదన వ్యక్తంచేశారు. నిర్వాహకులు బస్తాకు 4 కిలోల చొప్పున తరుగు తీస్తున్నారని అన్నారు. ఓ వైపు వర్షం వస్తుందేమోనని రోజూ భయపడాల్సి వస్తుందని పేర్కొంటున్నారు. కేంద్రం నిర్వాహకుడే దళారిగా మారి క్వింటాల్కు రూ.1,900 చొప్పున కొనుగోలు చేస్తున్నాడని విమర్శించారు. ప్రభుత్వ గిట్టుబాటు ధర రూ.2,200 ఉండగా, రూ.1,800 నుంచి రూ.1,900కు అమ్ముకోవడానికి సిద్ధమవుతున్నామని, మరికొందరు ఇప్పటికే అమ్ముకున్నారని చెబుతున్నారు. ఈ నిరసనలో రైతులు తోట సమ్మక విమల, రమ, రమక, నీలమ్మ, తిరుపతి, సమ్మయ్య, చంద్రయ్య, రాజసమ్మయ్య, బుచ్చన్న, రవీందర్ పాల్గొన్నారు.
నెల రోజులైనా నా వడ్లు కొనలే..
నేను 200 ధాన్యం బస్తాలను నెల రోజుల కిందట కొనుగోలు కేంద్రానికి తీసుకొచ్చిన. నిర్వాహకులు ధాన్యం వైపు కన్నెత్తి కూడా చూడలే. దీంతో బయట ప్రైవేటు వ్యక్తులకు క్వింటాల్కు రూ.1,800 చొప్పున అమ్ముకున్న. కొనుగోలు కేంద్రం నిర్వాహకులపై అధికారులకు ఫిర్యాదు చేసినా పట్టించుకుంటలేరు.
– బత్తుల వెంకటరాజం, రైతు, ఎడ్లపల్లి