Rythu Bharosa | హైదరాబాద్, జూన్ 21 (నమస్తే తెలంగాణ): రైతుభరోసాకు సంబంధించి సీఎం రేవంత్రెడ్డి చేసిన ప్రకటన అన్నదాతలను నిరాశ పరిచింది. ఈసారి కూడా పెట్టుబడి సాయం విత్తన దశలో కాకుండా, కోతల దశలో వస్తుందేమోననే చర్చ మొదలైంది. జూన్లోనే వానకాలం పెట్టుబడి సాయం పంపిణీని ప్రారంభించాల్సి ఉంటుంది. కానీ, ప్రభుత్వం ‘చర్చల’ పేరుతో పెట్టిన మె లికతో సెప్టెంబర్ వరకు రైతుభరోసా అందే అవకాశం లేదని వ్యవసాయ, ఆర్థికరంగ నిపుణులు భావిస్తున్నారు. రైతుభరోసా మార్గదర్శకాలపై క్యాబినెట్ సబ్ కమిటీని నియమిస్తున్నామని, ఈ కమిటీ జూలై 15 నాటికి ప్రభుత్వానికి నివేదిక ఇస్తుందని సీఎం చెప్పారు. ఆ తర్వాత ఈ నివేదికను అసెంబ్లీలో చర్చించి, తుది నిర్ణయం తీసుకుంటామని వెల్లడించారు అంటే, అసెంబ్లీ సమావేశాలు పూర్తయి, ప్రభుత్వం నిర్ణ యం తీసుకునేలోగా జూలై నెల ముగుస్తుం ది. ప్రభుత్వ నిర్ణయానికి అనుగుణంగా అధికారులు కొత్త నిబంధనలను రూపొందించాల్సి ఉంటుంది. ఆ తర్వాత అర్హుల జాబితాను రూపొందించాలి. వాటిని గ్రా మాలవారీగా ప్రదర్శించి, రైతుల నుంచి ఏ వైనా అభ్యంతరాలుంటే స్వీకరించి, మార్పులు చేయాల్సి ఉంటుంది.
రైతుభరోసా కింద కౌలు రైతులకు కూడా పెట్టుబడి సాయం ఇస్తామని ప్రకటించిన సంగతి తెలిసిందే. వారిని ఎలా గుర్తిస్తారనే సందేహాలు వ్యక్తమవుతున్నా యి. కౌలు సమయంలో రైతుల నుంచి అ ఫిడవిట్లు తీసుకున్న కౌలు రైతులకు పెట్టుబడి సాయం అందిస్తామని వ్యవసాయ శాఖ మంత్రి తుమ్మల నాగేశ్వర్రావు పేర్కొన్నారు. ఈ లెక్కన కౌలు రైతుల నుంచి దరఖాస్తులు స్వీకరించాల్సి ఉంటుంది. ఆ జాబితాపై అభ్యంతరాలు వ్యక్తమయ్యే క్రమంలో పరిష్కరించే బాధ్యత కూడా ప్రభుత్వంపైనే ఉండనున్నది. చివరగా.. కొత్తగా అర్హుల జాబితా, కౌలు రైతుల జాబితాను క్రోడీకరించి, ఒకే భూమికి ఇద్దరికి పెట్టుబడి సాయం అందకుండా వడబోయాల్సి వస్తుంది. వీటికి అనుగుణంగా సాఫ్ట్వేర్లో మార్పులు, చేర్పులు చేయాల్సి వస్తుంది. ఈ ప్రక్రియ పూర్తి కావడానికి కనీసం నెల నుంచి నెలన్నర సమయం పడుతుందని నిపుణులు చెప్తున్నారు. ఈ లెక్కన ఆగస్టులో కూడా రైతుభరోసా అందడం అసాధ్యమని స్పష్టంచేస్తున్నారు. సెప్టెంబర్లో పెట్టుబడి సాయం అందే అవకాశం ఉన్నదని భావిస్తున్నారు.
సీఎం రేవంత్రెడ్డి చేసిన తాజా ప్రకటనతో ప్రభుత్వం వరుసగా రెండోసారి పెట్టుబడి సాయాన్ని ఆలస్యం చేయనునున్నట్టు స్పష్టమవుతున్నదని రైతులు వాపోతున్నారు. తాము అధికారంలోకి వచ్చిన వెంటనే డిసెంబర్ 9నే రైతుభరోసా నిధు లు వేస్తామని ఎన్నికల సమయంలో కాం గ్రెస్ హడావుడి చేసిన సంగతి తెలిసిందే. తీరా అధికారంలోకి వచ్చిన తర్వాత ఆలస్యంగా పంపిణీని ప్రారంభించి, మే రెండో వారం వరకు కొనసాగించింది. ఈ దఫా కూడా ఇదే పరిస్థితి రానున్నది. ఇప్పటికే రైతులు అప్పులు తెచ్చి పంటలు వేస్తుండగా, పెట్టుబడి సాయం మాత్రం మరో రెండున్నర నెలల తర్వాత కోతలు ప్రారంభమయ్యే సమయంలో అందే అవకాశాలున్నాయని నిపుణులు చెప్తున్నారు.