సంగెం, మే 25 : మక్కజొన్న సొప్ప కాలుస్తుండగా పొగతో ఊపిరాడక ఓ రైతు మృతి చెందాడు. ఈ ఘటన శనివారం వరంగల్ జిల్లా సంగెం మండలం కాట్రపల్లి గ్రామంలో జరిగింది. కుటుంబ సభ్యుల కథనం ప్రకారం.. సంగెం మండలం కాట్రపల్లికి చెందిన గాయపు భగవాన్రెడ్డి (55) అనే రైతు తన మక్కజొన్న చేనులో శనివారం సాయంత్రం సొప్పకు నిప్పంటించాడు. అతడి చేను పూర్తిగా కాలి పక్కన ఉన్న రైతు భాస్కర్రెడ్డి వేసిన ఆయిల్పామ్ తోటలోని అంతర్గత పంటగా మక్కజొన్న చేనులోకి మంటలు వ్యాపించాయి. అందులో ఆయిల్పామ్ పంటతోపాటు డ్రిప్ పైపులు పూర్తిగా కాలిపోతాయనే భయంతో భగవాన్రెడ్డి మంటలను ఆర్పేందుకు ఆ చేనులోకి వెళ్లాడు. అప్పటికే చేను అంటుకోవడంతోపాటు విపరీతమైన పొగ రావడంతో ఊపిరి ఆడక భగవాన్రెడ్డి అక్కడికక్కడే మరణించాడు. భగవాన్రెడ్డికి తల్లి, భార్య, ముగ్గురు కుమార్తెలు ఉన్నారు. మృతదేహాన్ని వరంగల్ ఎంజీఎం దవాఖానకు తరలించారు.