రఘునాథపాలెం, జూలై 23 : నీళ్ల కోసం మోటర్ ఆన్ చేస్తుండగా విద్యుత్తు షాక్ తగిలి యువ రైతు మృతిచెందాడు. ఈ ఘటన ఖమ్మం జిల్లా రఘునాథపాలెం మండలం ఈర్లపూడి గ్రామంలో మంగళవారం చోటుచేసుకున్నది. కుటుంబ సభ్యుల కథనం ప్రకారం.. ఈర్లపూడి గ్రామానికి చెందిన యువ రైతు ముత్తంశెట్టి నర్సింహారావు (27) తనకున్న రెండెకరాల్లో ఈ ఏడాది పత్తి సాగు చేశాడు. వర్షం కాస్త తెరిపినివ్వడంతో చేనులో కలుపు మందు కొట్టేందుకు వెళ్లాడు. ఈ క్రమంలో నీళ్ల కోసం బోర్ వద్ద మోటర్ ఆన్ చేస్తుండగా విద్యుత్తు షాక్ తగిలి అక్కడికక్కడే మృతిచెందాడు. నర్సింహారావుకు ఏడాదిన్నర క్రితమే పెండ్లి కాగా.. భార్య, ఆరు నెలల పాప ఉన్నారు. ఇంటి వద్ద అప్పుడే కుమార్తెను ఆడించి వెళ్లిన నర్సింహారావు అంతలోనే కరెంట్ షాక్తో మృతిచెందినట్టు సమాచారం అందడంతో కుటుంబ సభ్యులు కన్నీరుమున్నీరుగా విలపించారు. కేసు నమోదు చేసి దర్యాప్తు చేస్తున్నట్టు సీఐ ఉస్మాన్ షరీఫ్ తెలిపారు.