పాలకుర్తి రూరల్, జూన్ 2: అప్పుల బాధతో రైతు ఆత్మహత్యకు పాల్పడిన ఘటన జనగామ జిల్లా పాలకుర్తి మండలం దర్ధేపల్లిలో ఆదివారం చోటుచేసుకుంది. గ్రామానికి చెందిన నిమ్మల యాకయ్య(50)కు రెండెకరాల వ్యవసాయ భూమి ఉంది. రెండేండ్లుగా పత్తి సాగు చేస్తున్నా సరైన దిగుబడి రాక, పెట్టిన పెట్టుబడులు మీదపడి రూ.2 లక్షల వరకు అప్పులయ్యాయి.
దీంతో మనస్తాపానికి గురై శనివారం పురుగుల మందు తాగి ఆత్మహత్యకు యత్నించాడు. కుటుంబ సభ్యులు మండల కేంద్రంలోని దవాఖానకు తరలించారు. వరంగల్కు తరలిస్తుండగా మార్గమధ్యంలో మృతి చెందాడు. భార్య ఫిర్యాదు మేరకు కేసు నమోదు చేసి దర్యాప్తు చేపట్టినట్టు పోలీసులు తెలిపారు.