ఎల్కతుర్తి, మే 28: అప్పుల బాధతో రైతు ఆత్మహత్య చేసుకున్న ఘటన హనుమకొండ జిల్లా ఎల్కతుర్తి మండలం గోపాల్పూర్లో మంగళవారం చోటుచేసుకున్నది. బంధువుల కథనం ప్రకారం.. పెండ్యాల నాగరాజు (37)కు గ్రామంలో 7.25 ఎకరాల భూమి ఉన్నది. ఇందులో వరి పంట వేశాడు. రెండేండ్లుగా పంట పెట్టుబడుల కోసం రూ.5 లక్షలు అప్పు చేశాడు.
పంట దిగుబడి రాకపోవడంతో అప్పులు తీర్చలేనని మనస్తాపానికి గురైన నాగరాజు పొలం వద్ద వేప చెట్టుకు ఉరేసుకొని ఆత్మహత్య చేసుకున్నాడు. గమనించిన స్థానికులు కుటుంబ సభ్యులకు సమాచారం ఇవ్వగా వారు వెళ్లి చూసేసరికి విగత జీవిగా కనిపించాడు. మృతుడికి భార్య, ఇద్దరు కుమార్తెలు ఉన్నారు. భార్య ఫిర్యాదు మేరకు కేసు నమోదు చేసినట్టు ఎస్సై రాజుకుమార్ తెలిపారు.