కుభీర్, జూలై 22: కూతురు పెండ్లి, ఇల్లు కట్టడానికి చేసిన అప్పులు ఎకరన్నర భూమి అమ్మినా తీరలేదని ట్రాన్స్ఫార్మర్ తీగలు పట్టుకుని రైతు ఆత్మహత్య చేసుకున్న ఘటన నిర్మల్ జిల్లా కుభీర్ మండలం సిర్పెల్లి(హెచ్)లో చోటు చేసుకున్నది. కుభీర్ ఏఎస్సై శివయ్య తెలిపిన ప్రకారం.. సిర్సెల్లి(హెచ్) గ్రామానికి చెందిన జాదవ్ మారుతి(45) ఐదున్నరెకరాల భూమిని సాగు చేసుకుంటూ, ఆటో నడుపుతున్నాడు. రెండేళ్ల క్రితం కూతురి పెండ్లికి రూ.10 లక్షలు, ఇల్లు కట్టడానికి రూ.12 లక్షల అప్పు చేశాడు. వడ్డీతో కలుపుకుని రూ.25 లక్షల వరకు అప్పు అయింది.
తనకున్న ఐదున్నరెకరాల్లో ఎకరంనర భూమి అమ్మగా వచ్చిన రూ.12 లక్షలతో కొంత అప్పు తీర్చాడు. రూ.13 లక్షల అప్పు తీర్చడానికి మిగిలిన నాలుగెకరాలు అమ్మితే కొడుకుకు భూమి ఎలా అని మదనపడి సోమవారం పల్సి తండా కు వెళ్తున్నానని ఇంట్లో భార్యకు చెప్పి ఆటో తీసుకుని వెళ్లాడు. పల్సి తండా సమీపంలో రోడ్డు పక్కన ఉన్న విద్యుత్ టాన్స్ఫార్మర్ తీగెలను పట్టుకుని మృతిచెందాడు. చేలలో పని చేస్తున్న రైతులు గమనించి మారుతి కుటుంబ సభ్యులకు సమాచారం అందించారు. ఘటనా స్థలానికి చేరుకున్న పోలీసులు పంచనామా నిర్వహించారు. భార్య జాదవ్ లక్ష్మి ఫిర్యాదు మేరకు పోలీసులు కేసు దర్యాప్తు చేస్తున్నారు.