కరీంనగర్ కార్పొరేషన్, జూన్ 23: కేంద్రంలోని బీజేపీ ప్రభుత్వం, రాష్ట్రంలోని కాంగ్రెస్ ప్రభుత్వం కలిసి సింగరేణిని ఖతం చేసేందుకు కుట్రలు చేస్తున్నాయని, అందులో భాగంగానే బొగ్గు గనులను అమ్మకానికి పెట్టాయని మాజీ మంత్రి కొప్పుల ఈశ్వర్ మండిపడ్డారు. కేంద్ర బొగ్గు గనుల శాఖ మంత్రిగా బాధ్యతలు చేపట్టిన పది రోజుల్లోనే కిషన్రెడ్డి సొంత రాష్ర్టానికే ద్రోహం చేస్తున్నారని ఆగ్రహం వ్యక్తంచేశారు. ప్రతిపక్షంలో ఉన్నప్పుడు బొగ్గు బ్లాకుల వేలాన్ని వ్యతిరేకిస్తూ ప్రధాని మోదీకి లేఖ రాసిన సీఎం రేవంత్రెడ్డి.. ఇప్పుడు ఎందుకు లేఖ రాయడంలేదని ప్రశ్నించారు. బొగ్గు గనుల వేలాన్ని వ్యతిరేకిస్తున్నామంటూ మీడియా ముందు ప్రగల్భాలు పలికిన డిప్యూటీ సీఎం భట్టి విక్రమార్క.. ఏ ముఖం పెట్టుకొని వేలంలో పాల్గొంటున్నారని నిలదీశారు. ఆదివారం కరీంనగర్లోని తన క్యాంపు కార్యాలయంలో కొప్పుల మీడియాతో మాట్లాడారు. లక్షల మంది జీవితాలతో ముడిపడి ఉన్న సింగరేణిని కేసీఆర్ రక్షించారని, కేంద్రం ఎన్ని ఒత్తిళ్లు తెచ్చినా ప్రైవేట్పరం చేసేందుకు ఒప్పుకోలేదని గుర్తుచేశారు. ఉమ్మడి పాలనలో నష్టాల్లో ఉన్న సింగరేణిని లాభాల బాట పట్టించిన ఘనత ఆయనకే దక్కిందని చెప్పారు. ఆరు జిల్లాల పరిధిలో విస్తరించి ఉన్న సింగరేణి సంస్థను కార్పొరేట్ శక్తులకు అప్పగిస్తే ఊరుకోబోమని హెచ్చరించారు. ఈ నిర్ణయాన్ని ఉపసంహరించుకోవాలని డిమాండ్ చేశారు. సింగరేణి కార్మిక సంఘాలు స్పందించి బీఆర్ఎస్ చేసే పోరాటంలో కలిసిరావాలని పిలుపునిచ్చారు. ఈ సమావేశంలో మాజీ ఎమ్మెల్యే పుట్ట మధూకర్, బీఆర్ఎస్ రాష్ట్ర నాయకులు ఓరుగంటి రమణారావు, గంగుల అశోక్ తదితరులు పాల్గొన్నారు.